سىرتقى ىستەر مينىستىرلىگى شەتەلدە تۇراقتى تۇرىپ جاتقاندارعا سول ەلدە قالا تۇرۋعا كەڭەس بەرەدى
«قازاقستاننىڭ ءاربىر ەلشىلىگىندە جەدەل شتاب قۇرىلعان. ولار قوڭىراۋلار مەن ەلەكتروندى پوشتا ارقىلى وتىمدەردى قابىل الىپ، كۇنى- ءتۇنى جۇمىس ىستەپ جاتىر. ءوتىنىش تۇسكەن ساتتەن- اق ولاردى تەكسەرىپ، كونسۋلدىق ەسەپكە الامىز، جەرگىلىكتى بيلىكپەن بايلانىسامىز. نەگىزىنەن سول ەلدەردىڭ سىرتقى ىستەر مينيسترلىكتەرى ارقىلى جۇمىس ىستەپ جاتىرمىز. ديپلوماتتاردىڭ ەشقايسى ۆيرۋس جۇقتىرعان جوق. ديپلوماتيالىق كورپۋس وكىلدىكتەرىمىزدەن دە كورونوۆيرۋس جۇقتىردى دەگەن كۇدىگىنە ىلىككەندەر بولعان ەمەس. دەگەنمەن، ولار وزدەرىنىڭ دەنساۋلىقتارىنا قاتەر توندىرە وتىرىپ، الدىعى شەتپە جۇمىس ىستەۋدە. ديپلوماتتارىمىز ادامدار كوپ جينالاتىن اۋەجاي سياقتى جەرلەرگە ءوز كولىكتەرىمەن ءجيى بارىپ، ازاماتتارىمىزدى شىعارىپ سالادى»،- دەدى ايبەك سمادياروۆ.
ونىڭ اتاپ وتۋىنشە، كوروناۆيرۋس ءورشىپ تۇرعان ەلدەردەگى ديپلوماتتاردىڭ وتباسىلارى ءۇي رەجيمىنە اۋىستىرىلعان جانە ەشقايدا شىقپايدى. بالالاردى قاشىقتان ءبىلىم الۋدا نەمەسە دەمالىسقا جىبەرىلگەن.
«دەنساۋلىق ساقتاۋ مينيسترلىگىنىڭ شتابىمەن، اكىمدىكتەرمەن تىعىز جۇمىس ىستەپ جاتىرمىز. بۇگىننەن باستاپ ازاماتتارىمىز ەلگە ورالا باستايدى. ءتۇرلى ەلدەردە تۇراقتى تۇراتىن، جۇمىس ىستەيتىن، وقيتىن ازاماتتارىمىز بار. ولاردىڭ ءارقايسىسى دەربەس شەشىم قابىلدايدى. دەگەنمەن، ءبىز ولارعا تۇرىپ جاتقان ەلدەرىنىڭ ەرەجەلەرىن ساقتاۋعا جانە سول جەردە قالۋعا كەڭەس بەرەمىز. ءبىراق، ازاماتتارىمىز ەلگە ورالۋعا نيەت بىلدىرسە، وندا ۇكىمەت ولاردى ەلگە الىپ كەلەدى» ، - دەدى ايبەك سمادياروۆ.