كوروناۆيرۋس: ەلوردا تۇرعىندارىنا ەكسپرەسس تەستىلەۋ جۇرگىزىلەدى

نۇر-سۇلتان. قازاقپارات - ەلوردا تۇرعىندارىنا الداعى ەكى اپتادا كوروناۆيرۋس ينفەكسياسىنا ەكسپرەسس تەستىلەۋ جۇرگىزىلەدى.

بۇل تۋرالى نۇر- سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ايتىپ بەردى، دەپ حابارلايدى قازاقپارات ءتىلشىسى.

«حالىق اراسىندا كوروناۆيرۋس ينفەكسياسىنا ەكسپرەسس تەستىلەۋ جۇرگىزۋ جاقىن اراداعى ەكى اپتاعا جوسپارلانعان. ءقازىر كوروناۆيرۋس ينفەكتسياسىنىڭ تارالۋى وسى ماسەلەگە جاۋاپتى ۆەدومستۆولار مەن ورگانداردىڭ باقىلاۋىندا. قازىرگى ۋاقىتتا كوروناۆيرۋس ينفەكتسياسىن دياگنوستيكالاۋ پوليمەرازدى تىزبەكتىك رەاكتسيا ادىسىمەن ناۋقاستارمەن بايلانىستا بولعاندارعا جانە جۇقتىرۋ قاۋپى جوعارى ادامدارعا عانا جۇرگىزىلەدى»، - دەدى باسقارما باسشىسى قالا اكىمدىگىندە وتكەن ونلاين بريفينگىدە.

بۇعان دەيىن باسقارما باسشىسى نۇر- سۇلتاندا كورناۆيرۋس جۇقتىرعانداردىڭ باسىم بولىگى 30-49 جاس ارالىعىندا ەكەنىن مالىمدەگەن ەدى. نۇر-سۇلتان قالاسى بويىنشا تىركەلگەن بارلىق 25 جاعداي بويىنشا جاقىن بايلانىستا بولعان 244 ادام نۇر-سۇلتان مەن وزگە وڭىرلەردەگى اۋرۋحانالارعا جاتقىزىلدى.

ەسكە سالا كەتسەك، قازاقستاندا قازىر كوروناۆيرۋس ينفەكسياسىن جۇقتىرعاندار 49 ادام بولدى. الماتىدا - 22 ادام، قاراعاندى قالاسىندا - 2 ادام، نۇر-سۇلتاندا - 25 ادام تىركەلگەن.