ەلوردالىق كاسىپكەر تۇرعىندارعا تەگىن ماسكا تاراتتى

نۇر- سۇلتان. قازاقپارات - ەلوردالىق كاسىپكەر ەرنۇر بولات ۇلى جۋناليستەرگە، قالا تۇرعىندارىنا جانە كوشە تازالىعىنا جاۋاپتى جۇمىسشىلارعا تەگىن ماسكا تاراتتى، دەپ حابارلايدى قازاقپارات ءتىلشىسى.

كاسىپكەر ءوز ىسىمەن حالىقتى كوروناۆيرۋس ىندەتىمەن بىرلەسىپ كۇرەسۋگە شاقىرعىسى كەلەدى.

«بۇل - ەلىمىزدىڭ، ءتىپتى بۇكىل الەمنىڭ باسىنا تۇسكەن سىناق. وسىنداي جاعدايدا دەرتپەن بۇكىل ادامزات بالاسى بىرلەسىپ كۇرەسۋى ءتيىس. وكىنىشكە وراي، ءبىر- بىرىمىزگە قول ۇشىن بەرگەننىڭ ورنىنا، قاجەتتى زاتتاردىڭ باعاسىن كوتەرىپ، بەتپەردەلەردى قىمباتقا ساتىپ جاتقان كەيبىر الىپساتارلاردىڭ ءىسى مەنى قاتتى ويلاندىردى. قولىمنان كەلگەنشە سولاردىڭ قولىنداعى ماسكالاردى جيناپ الىپ، حالىققا تەگىن تاراتايىن دەپ شەشتىم. ارينە ەڭ اۋەلى الدىڭعى شەپتە جۇرگەن دارىگەرلەرگە قولداۋ ءبىلدىرۋىمىز كەرەك. سونىمەن بىرگە جارقۇلاعى جاستىققا تيمەي حالىقتى اقپاراتپەن قامتاماسىز ەتىپ جاتقان جۋرناليستەردىڭ ەڭبەگى ەرەكشە دەپ ايتقىم كەلەدى. وسىنداي قيىن ساتتە دالادا جۇرگەن كوشە تازالىقشىلارىنىڭ دا ەڭبەگى ەرەن. سول ءۇشىن العاشقى ماسكالاردى وسى كىسىلەرگە تاراتتىق. بارلىقتارىڭىزعا بەلگىلى، بيىل - ۆولونتەر جىلى. وسى ورايدا بارلىق كاسىپكەرلەردى قيىن كۇندە حالىقپەن بىرگە بولۋعا شاقىرامىن» ، - دەيدى ە. بولات ۇلى.

بۇگىن كاسىپكەر 2 مىڭ داناعا جۋىق مەديتسينالىق ماسكانى تاراتىپ بەردى. ەرنۇر بولات ۇلى قايىرىمدىلىق شارالارىن الداعى ۋاقىتتا دا جالعاستىرا بەرمەك.

اۆتور: ريزابەك نۇسىپبەك ۇلى