كوروناۆيرۋس: الماتىعا قىتاي مەملەكەتىنەن دارىگەرلەر شاقىرۋدىڭ قاجەتتى جوق

الماتى. قازاقپارات - الماتىعا قىتاي مەملەكەتىنەن دارىگەرلەر شاقىرۋدىڭ قاجەتتى جوق. بۇل تۋرالى بۇگىن قالالىق قوعامدىق دەنساۋلىق ساقتاۋ باسقارماسى وكىلدەرىنىڭ ب ا ق وكىلدەرىنە بەرگەن ونلاين جاۋابىندا ايتىلدى، دەپ حابارلايدى قازاقپارات ءتىلشىسى.

قۇزىرلى ورگان وكىلدەرىنىڭ ايتۋىنشا، الماتىدا مەديتسينا قىزمەتكەرلەرى جەكە قورعانىس قۇرالدارىمەن (ارنايى كوستيۋمدەر، رەسپيراتورلار، ماسكالار)، دەزينفەكتسيالىق جانە انتيسەپتيكتەرمەن جەتكىلىكتى مولشەردە قامتاماسىز ەتىلگەن. مەديتسينا قىزمەتكەرلەرى جۇمىسقا كىرۋ جانە شىعۋ كەزىندە تەرمومەتريادان ءوتىپ، ەپيدەمياعا قارسى شارالاردى قاتاڭ ساقتايدى. قازىرگى ۋاقىتتا مەديتسينا قىزمەتكەرلەرى اراسىندا ۆيرۋس جۇقتىرۋ فاكتىلەرى انىقتالعان جوق. سونىمەن قاتار، مەديتسينا ماماندارى اراسىندا تاپشىلىق جوق. «قىتايدان ەشقانداي دارىگەر شاقىرتقان جوقپىز. سەبەبى، وعان قاجەتتىلىك جوق. ءبىزدىڭ دارىگەرلەردىڭ بىلىكتىلىگى جەتكىلىكتى»، - دەدى باسپا ءسوز قىزمەتى.

الماتىدا كۇندىزگى ستاتسيونار بولىمشەلەر شتاتتىق رەجىمدە جۇمىس ىستەپ جاتىر. ەمحانالاردا مۇمكىندىككە قاراي كەيبىر قىزمەت تۇرلەرى: ءدارى رەتسەپتىلەرىن جىبەرۋ، ۋاقىتشا ەڭبەككە جارامسىزدىق تۋرالى قۇجات، كەڭەس بەرۋ، ءتۇسىندىرۋ جۇمىستارى ونلاين فورماتقا اۋىستى. دارىگەرگە جازىلۋ بۇرىنعى تارتىپپەن جالعاسادى. جوسپارلى وپەراتسيالار جوسپارلى تۇردە جۇرگىزىلەدى. اراسىندا ۋاقىت وزگەرىستەرى بولۋى مۇمكىن.

«ەپيدەميولوگيالىق احۋال ناشارلاعان جاعدايدا الماتىدا قوسىمشا توسەك ورىندار جاساقتالادى. ازىرگە الماتىدا پروۆيزورلىق كلينيكالاردا ورىن جەتكىلىكتى»، - دەدى باسپا ءسوز قىزمەتىنەن.