جانىبەك ءالىمحان ۇلىنىڭ جەكپە-جەگى كەيىنگە قالدى

نۇر-سۇلتان. قازاقپارات - قازاقستاندىق كاسىپقوي بوكسشى جانىبەك ءالىمحان ۇلىنىڭ 28 ناۋرىزعا جوسپارلانعان كەزەكتى جەكپە-جەگى كەيىنگە قالدى، دەپ حابارلايدى قازاقپارات ءتىلشىسى.

«وكىنىشكە وراي 28-ناۋرىزدا كانادادا وتەتىن جەكپە-جەك كەيىنگە قالدى. كوروناۆيرۋستىڭ سالقىنى ءبىزدىڭ جەكپە-جەككە دە ءتيدى. ءۇش اي قان مەن تەر شىعارىپ، قىزۋ دايىندالىپ، جاقسى فورماعا كىرىپ ەدىك. مىقتى سپاررينگتەر جاساپ، QAZAQ STYLE- دى شىڭداپ، شوۋ كورسەتۋگە دايىن بولعانبىز. ءبىراق توپ رەنك (Top Rank Promotions كومپانياسى) سپورتشىلاردىڭ دەنساۋلىعى ماڭىزدى دەپ شەشتى. ءبىزدىڭ عانا ەمەس ناۋرىز بەن ساۋىردە وتەتىن بۇكىل جەكپە-جەكتەر توقتاتىلدى»، - دەپ جازدى جانىبەك ءالىمحان ۇلى Instagram - داعى پاراقشاسىندا.

ەستەرىڭىزگە سالا كەتەيىك، وسىعان دەيىن جانىبەك ءالىمحان ۇلىنىڭ 28- ناۋرىزدا كىممەن جۇدىرىقتاساتىنى تۋرالى جازعان بولاتىنبىز.

اۆتور: كۇنسۇلتان وتارباي