اقتوبەلىك مۇعالىم قازاق تىلىندە ەسەپ شىعارۋ كانالىن اشتى

اقتوبە. قازاقپارات - نازاربايەۆ زياتكەرلىك مەكتەبىندەگى حيميا ءپانىنىڭ مۇعالىمى عالىمجان تولەۋشوۆ الەۋمەتتىك جەلى ارقىلى ەسەپ شىعارۋدى ۇيرەتىپ ءجۇر.

«بولاشاق» باعدارلاماسىنىڭ تۇلەگى ۇ ب ت-عا دايىندىقتى باستاپ كەتكەن، دەپ حابارلايدى قازاقپارات ءتىلشىسى.

عالىمجان تولەۋشوۆ اقتوبە قالاسىندا ءبىلىم الىپ، مەكتەپ بىتىرگەن سوڭ نۇر-سۇلتان قالاسىندا ۇلتتىق ۋنيۆەرسيتەتتە وقىدى. كەيىن «بولاشاق» باعدارلاماسىمەن تاجىريبە جينادى. حيميا عىلىمدارىنىن ماگيسترى، ۇلى بريتانيادا تاجىريبە الماسۋ كۋرسىنىڭ قاتىسۋشىسى، حالىقارالىق IELTS سەرتيفيكاتى - 7.5. سونىمەن قاتار قازاق ادەبيەتىنە دەگەن قىزىعۋشىلىعى زور، ولەڭ شىعارادى. شەتەلدە ءبىلىم الىپ كەلگەن سوڭ ەلورداداعى جوعارى وقۋ ورنىندا ءدارىس بەردى. كەيىن اتا- اناسىنىڭ جانىنا كەلىپ، مەكتەپكە جۇمىسقا ورنالاستى.

«العاشىندا تاقىرىپتىق ەسەپتەرگە سۇرانىس جوعارى بولدى. قازىر ۇ ب ت سۇراقتارىنا باسىمدىق بەرىلىپ جاتىر. YouTube ۆيدەوحوستينگىندەگى كانالدا ءبىرىڭعاي قازاق تىلىندە ۆيدەو سالىپ ءجۇرمىن. اپتاسىنا ءبىر رەت بايلانىسقا شىعامىن. ءبىر ۆيدەودا 5-6 ەسەپتىڭ شەشىمى بولادى. 10 مينۋتتان اسىپ كەتسە، ادامدار جالىعىپ كەتەدى»، - دەدى ول.

جاس ماماننىڭ «ChemEasy - حيميا بىزبەن جەڭىل» YouTube كانالىندا ءبىرىڭعاي قازاق تىلىندە ونلاين ساباق مەن ەكسپەريمەنت جۇرگىزگەنىنە ءبىر جىلدان استى. بۇل يدەيا 12 سىنىپ وقۋشىلارىن كەمبريدج حالىقارالىق ەمتيحانىنا دايىنداۋ بارىسىندا تۋىنداعان. ۇستاز باستاپقى ۋاقىتتا ۆيدەولار اعىلشىن تىلىندە تۇسىرىلگەنىن، كەيىن قازاق تىلىنە كوشكەنىن ايتتى.

«اعىلشىن تىلىندەگى ماتەريالداردىڭ كەڭ اۋقىمىن بايقادىم. ال حيميا ءپانىن وقىتاتىن قازاقشا كانالدار جوقتىن قاسى جانە اقىلى. ساراپتامادان سوڭ انا تىلىمىزدە شاعىن ۆيدەولاردان تۇراتىن قولجەتىمدى كونتەنت جاساۋدى ۇيعاردىم. YouTube جەلىسىنىڭ اقپاراتتىق ءرولىن عانا قاراستىرىپ قويماي، وقىتۋ رەسۋرسى رەتىندە ءبىلىمنىڭ دامۋىنا جول اشاتىنىڭ اتاپ ءوتۋ كەرەك»، - دەيدى اقتوبەلىك ۇستاز. زياتكەرلەر وزدەرىنە قىزىقتى تاقىرىپتاردى ۇسىنادى، كانالدى ارلەندىرۋ جولدارىمەن كومەكتەسەدى.

الداعى ۋاقىتتا اعىلشىن تىلىندە NUFIPET، SAT ەمتيحاندارى باعىتىندا جاڭا ۆيدەولار ءتۇسىرۋ جوسپاردا بار. كانالعا 750 ادام جازىلعان. قولدانۋشىلاردىڭ جاسى 13 پەن 24 جاس ارالىعىندا. «جوسپار بويىنشا اقپاراتتىق پورتال اشىپ، كۇندەلىكتى ساباعىمدى ونلاين وتكىزگىم كەلەدى. ءبىر جىلدان سوڭ ىسكە اسىرىپ، جاڭا باعىتتى قامتۋدى ماقسات ەتتىم»، - دەدى ول.