ديماش قۇدايبەرگەن كوروناۆيرۋسقا بايلانىستى الەمدىك تۋرنەسىن كەيىنگە قالدىردى
«قۇرمەتتى دوستار! ديماش قۇدايبەرگەننىڭ «Arnau Tour» الەمدىك تۋرنەسى اياسىنداعى كونسەرتتەرى كەيىنگە شەگەرىلدى. كوروناۆيرۋس ينفەكسياسىنىڭ الدىن الۋ شارالارىنا بايلانىستى ديماشتىڭ پراگا، گامبۋرگ، ديۋسسەلدورف، شتۋتگارت پەن مينسكتەگى كونتسەرتتەرى باسقا ۋاقىتقا شەگەرىلەدى. جاڭا مەرزىم بويىنشا ءبىراز ۋاقىتتان سوڭ حابار بەرەمىز. ونىڭ ءبارىن قارسى الاتىن تاراپ پەن ۇيىمداستىرۋشىلارمەن اقىلداسۋ كەرەك»، - دەپ جازدى ءانشىنىڭ اكەسى قانات ايتبايەۆ Instagram پاراقشاسىندا.
ءانشىنىڭ اكەسى سونىمەن قاتار كورەرمەننىڭ ديماشتىڭ ونەرىنە دەگەن شەكسىز ىقىلاسىنا العىسىن ءبىلدىردى.
«ايتسە دە قازىرگى كۇردەلى جاعدايدا ءاربىرىمىز ءوز دەنساۋلىعىمىزعا قاراپ، قاۋىپسىزدىك شارالارىن كۇشەيتۋىمىز كەرەك. كوپ ۋاقىت وتپەي كونسەرتتىك الاڭدا كەزدەسەرمىز دەگەن ۇمىتتەمىز. قولداۋلارىڭىز بەن ماحاباتتارىڭىز ءۇشىن مىڭ دا ءبىر راحمەت! ءوز وزدەرىڭىزگە ساق بولىڭىزدار!» - دەپ جازدى ءانشىنىڭ اكەسى.
اۆتور: ايان بەكەن ۇلى