توتەنشە جاعداي رەجيمى كەزىندە شەكارا ارقىلى وتۋگە قانداي جاعدايدا شەكتەۋ قويىلادى

نۇر-سۇلتان. قازاقپارات – ق ر سىرتقى ىستەر مينيسترلىگى توتەنشە جاعداي رەجيمى ەنگىزىلگەن كەزدە ەل شەكاراسىنان كىمدەردىڭ وتۋىنە شەكتەۋ قويىلاتىندىعىن ناقتىلادى، دەپ حابارلايدى قازاقپارات.

مينيسترلىك تاراتقان اقپاراتتارعا قاراعاندا، قازاقستان رەسپۋبليكاسىندا 2020 -جىلعى 16-ناۋرىزداعى ساعات 08.00-دەن باستاپ توتەنشە جاعدايدىڭ ەنگىزىلۋىنە بايلانىستى ونىڭ قولدانىلۋ كەزەڭىندە كەلەسى شارالار قابىلداناتىن بولادى:

1. توتەنشە جاعداي قولدانىلاتىن كەزەڭدە قازاقستان رەسپۋبليكاسىنىڭ ازاماتتارى مەن شەتەلدىكتەردىڭ مەملەكەتتىك شەكارا ارقىلى كىرۋىنە - شىعۋىنا شەكتەۋ ەنگىزىلەتىن بولادى. تومەندەگى جاعدايلاردان باسقا: بۇرىن شەت مەملەكەتتىڭ اۋماعىنا شىققان جانە قازاقستان رەسپۋبليكاسىنا قايتىپ كەلگەن قازاقستان رەسپۋبليكاسىنىڭ ازاماتتارى؛ دەنساۋلىق ساقتاۋ مەكەمەلەرىنىڭ راستايتىن قۇجاتتارىن ۇسىنىپ، شەتەلگە ەمدەلۋگە شىعاتىن قازاقستان رەسپۋبليكاسىنىڭ ازاماتتارى؛ وسىعان دەيىن قازاقستان رەسپۋبليكاسىنىڭ اۋماعىنا كىرگەن جانە ەلدەن شىعاتىن شەتەلدىكتەر؛

ەلىمىزدىڭ جانە شەت مەملەكەتتەردىڭ ديپلوماتيالىق قىزمەت پەرسونالى جانە ولاردىڭ وتباسى مۇشەلەرى، سونداي-اق قازاقستان رەسپۋبليكاسى سىرتقى ىستەر مينيسترلىگىنىڭ شاقىرۋى بويىنشا قازاقستانعا كەلەتىن شەت مەملەكەتتەر مەن حالىقارالىق ۇيىمداردىڭ دەلەگاتسيالارىنىڭ مۇشەلەرى؛ پوەزدىق جانە لوكوموتيۆ بريگادالارىنىڭ، اۋە جانە تەڭىز كەمەلەرى ەكيپاجدارىنىڭ مۇشەلەرى؛ قازاقستان رەسپۋبليكاسىنىڭ اۋماعىنداعى شەتەلدىك ترانسشەكارالىق قۇرىلىستارعا قىزمەت كورسەتەتىن پەرسونال جانە شەكتەس مەملەكەتتەردىڭ اۋماعىنداعى قازاقستاندىق ترانسشەكارالىق قۇرىلىستارعا قىزمەت كورسەتەتىن پەرسونال؛

شەكتەۋلەردى ەنگىزگەنگە دەيىن (2020 -جىلعى 16-ناۋرىز ساعات 08.00 گە دەيىن) جولعا شىققان جانە ترانزيتتىك جولاۋشىلار پوەزىمەن جولدا كەلە جاتقان شەتەلدىكتەر؛ قازاقستان رەسپۋبليكاسىنىڭ اۋماعىندا تۇرۋعا ىقتيارحاتتارى بار شەتەلدىكتەر (ازاماتتىعى جوق تۇلعالار)؛ قازاقستان رەسپۋبليكاسى ازاماتىنىڭ وتباسى مۇشەسى بولىپ تابىلاتىن شەتەل ازاماتى (تۋىستىق بايلانىس فاكتىسى راستالعان جاعدايدا - جۇبايى (زايىبى) ، ولاردىڭ اتا- انالارى مەن بالالارى).

2. تاراپتار ازاماتتارىنا شۇعىل مەديتسينالىق كومەك كورسەتۋ ءۇشىن جۇگىنگەن جاعدايلاردى قوسپاعاندا، قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەسپۋبليكاسىنىڭ جانە رەسەي فەدەراتسياسىنىڭ شەكارا ماڭىنداعى اۋماقتارى تۇرعىندارىنىڭ قازاقستان- رەسەي مەملەكەتتىك شەكاراسىن كەسىپ ءوتۋ ءتارتىبى تۋرالى كەلىسىمگە سايكەس جۇمىس ىستەيتىن قازاقستان- رەسەي مەملەكەتتىك شەكاراسىنداعى وتكىزۋ ورىندارى ارقىلى جەرگىلىكتى تۇرعىنداردى وتكىزۋ توقتاتىلا تۇرسىن.

ترانسشەكارالىق قۇرىلىستار - مەملەكەتتىك شەكارانى كەسىپ وتەتىن تەمىرجولدار، اۆتوموبيل جولدارى، قۇبىرلار، ەلەكتر بەرۋ جەلىلەرى، كابەلدەر، كوپىرلەر، بوگەتتەر، شليۋزدەر، سۋ ارنالارىنىڭ قۇرىلىستارى جانە باسقا دا قۇرىلىستار، سونداي-اق تاراپتاردىڭ ءبىرىنىڭ شەكارا ماڭىنداعى اۋماق (شەكارا ايماعى) شەگىندە، ەكىنشى تاراپ مەملەكەتىنىڭ اۋماعىنداعى وبەكتىلەرى.