كوروناۆيرۋس جۇقتىرعان الماتىلىق ايەل قىلمىستىق جاۋاپكەرشىلىككە تارتىلدى

نۇر-سۇلتان. قازاقپارات - الماتىدا كوروناۆيرۋسپەن اۋىرعان ايەل وزىمەن بايلانىستا بولعان ادامدار تۋرالى مالىمەت بەرۋدەن باس تارتقانى ءۇشىن قىلمىستىق جاۋاپكەرشىلىككە تارتىلدى، دەپ حابارلايدى قازاقپارات ءتىلشىسى.

«الماتى قالالىق پوليتسيا دەپارتامەنتى كوروناۆيرۋسپەن اۋىرعانداردىڭ ءبىرى - ازاماتشا ب- نىڭ سانيتارلىق قىزمەت جۇمىسىنا كەدەرگى كەلتىرىپ، ۆيرۋسقا شالدىققاننان كەيىن وزىمەن بايلانىستا بولعان ازاماتتاردىڭ مالىمەتتەرىن بەرۋدەن قاساقانا باس تارتقانىن حابارلايدى. ايەل قر قىلمىستىق كودەكسىنىڭ 304-بابىندا (سانيتارلىق ەرەجەنى نەمەسە گيگيەنالىق نورماتيۆتەردى بۇزۋ) كوزدەلگەن قىلمىستىڭ بەلگىلەرى بويىنشا قىلمىستىق جاۋاپكەرشىلىككە تارتىلدى»، - دەپ اتاپ وتەدى قالالىق پوليتسيا دەپارتامەنتىنەن.

الماتى قالالىق پوليتسياسى ورىن العان كۇردەلى جاعدايعا بايلانىستى ازاماتتاردى قالالىق قىزمەتتەرگە كوروناۆيرۋس ينفەكسياسىن انىقتاۋ جانە الدىن الۋ بويىنشا بارىنشا جاردەم كورسەتۋگە جانە جۇرگىزىلىپ جاتقان شارالارعا تۇسىنىستىكپەن قاراۋعا شاقىرادى.

ايتا كەتەيىك، مەملەكەت باسشىسى قاسىم-جومارت توقايەۆ قازاقستان رەسپۋبليكاسىندا 2020 -جىلعى 16-ناۋرىزداعى 08 ساعات 00 مينۋت پەن 2020 -جىلعى 15-ساۋىردەگى 07 ساعات 00 مينۋت كەزەڭىندە توتەنشە جاعداي ەنگىزۋ تۋرالى جارلىققا قول قويدى.

جارلىققا سايكەس، مەديتسينالىق تەكسەرۋدەن جانە ەمدەلۋدەن، كارانتيندىك رەجيمدى ساقتاۋدان باس تارتاتىن، ەپيدەميولوگيالىق جاعدايدى ايقىنداۋ ءۇشىن ماڭىزى بار دەرەكتەردى جاسىراتىن ادامدارعا باقىلاۋ، سونداي-اق اتالعان ادامداردىڭ جاۋاپتىلىعىنىڭ شارالارى كۇشەيتىلەدى.