قاسىم-جومارت توقايەۆ تەلەۆيزيا ارقىلى ۇندەۋ جاسايدى
دۇنيەجۇزىلىك دەنساۋلىق ساقتاۋ ۇيىمىنىڭ جاڭا COVID-19 كوروناۆيرۋسىن پاندەميا دەپ جاريالاۋىنا بايلانىستى مەملەكەت باسشىسى ازاماتتاردىڭ ءومىرى مەن دەنساۋلىعىن قورعاۋ ماقساتىندا قازاقستان رەسپۋبليكاسىنىڭ بارلىق اۋماعىندا 2020 -جىلعى ناۋرىزدىڭ 16 ى، ساعات 08:00 دەن 2020 -جىلعى 15-ءساۋىر كۇنگى ساعات 07:00 گە دەيىن توتەنشە جاعداي ەنگىزدى. پرەزيدەنت توتەنشە جاعداي كەزەڭىندە توتەنشە جاعداي رەجيمىن قامتاماسىز ەتەتىن مەملەكەتتىك كوميسسيا قۇردى. ونىڭ قۇرامىنا پرەمەر- مينيستر، ءبىرقاتار جوعارى مەملەكەتتىك ورگان باسشىلارى كىردى.
جارلىققا سايكەس، توتەنشە جاعداي كەزىندە مىنانداي شارالار مەن ۋاقىتشا شەكتەۋلەر ەنگىزىلەدى.
1) قوعامدىق ءتارتىپتىڭ ساقتالۋى، اسا ماڭىزدى مەملەكەتتىك جانە ستراتەگيالىق، ەرەكشە رەجيمدىك، رەجيمدىك جانە ەرەكشە قورعالاتىن وبەكتىلەردىڭ، سونداي-اق حالىقتىڭ تىنىس- تىرشىلىگىن جانە كولىك قىزمەتىنىڭ جۇمىس ىستەۋىن قامتاماسىز ەتەتىن وبەكتىلەردىڭ كۇزەتىلۋى كۇشەيتىلەدى؛
2) ءىرى ساۋدا نىساندارىنىڭ جۇمىس ىستەۋىنە شەكتەۋ قويىلادى؛
3) ساۋدا ويىن- ساۋىق ورتالىقتارىنىڭ، كينوتەاترلاردىڭ، تەاترلاردىڭ، كورمەلەردىڭ جانە ادامدار كوپ جينالاتىن باسقا دا وبەكتىلەردىڭ قىزمەتىن توقتاتا تۇرادى؛
4) كارانتين ەنگىزىلەدى، سانيتاريالىق- ەپيدەمياعا قارسى اۋقىمدى ءىس- شارالاردى، ونىڭ ىشىندە قازاقستان رەسپۋبليكاسى قورعانىس مينيسترلىگىنىڭ جانە ىشكى ىستەر ورگاندارىنىڭ حالىقتىڭ سانيتاريالىق- ەپيدەميولوگيالىق سالاماتتىلىعى سالاسىنداعى قىزمەتتى جۇزەگە اسىراتىن قۇرىلىمدىق بولىمشەلەرىنىڭ قاتىسۋىمەن جۇزەگە اسىرىلادى؛
5) ويىن- ساۋىق، سپورتتىق جانە باسقا دا بۇقارالىق ءىس- شارالاردى، سونداي- اق وتباسىلىق، سالت- ءداستۇر ءىس- شارالارىن وتكىزۋگە تىيىم سالىنادى؛
6) قازاقستان رەسپۋبليكاسىنىڭ جانە شەت مەملەكەتتەردىڭ ديپلوماتيالىق قىزمەتىنىڭ پەرسونالىن، سونداي-اق، قازاقستان رەسپۋبليكاسى سىرتقى ىستەر مينيسترلىگىنىڭ شاقىرۋىمەن قازاقستان رەسپۋبليكاسىنا كەلەتىن حالىقارالىق ۇيىمدار دەلەگاتسيالارىنىڭ مۇشەلەرىن قوسپاعاندا، قازاقستان رەسپۋبليكاسىنىڭ اۋماعىنا كولىكتىڭ بارلىق تۇرلەرىمەن كىرۋگە، سونداي-اق ونىڭ اۋماعىنان شىعۋعا شەكتەۋلەر بەلگىلەنەدى.
ايتا كەتەيىك، مەملەكەت باسشىسى ەرتەڭ، ياعني، 16-ناۋرىز كۇنى تەلەۆيزيا ارقىلى ۇندەۋ جاسايدى.