قورعاس حالىقارالىق ورتالىعىنىڭ جۇمىسى توقتاتىلدى
«قازاقستان رەسپۋبليكاسىندا كوروناۆيرۋس ينفەكسياسىنىڭ تىركەلۋى لابوراتوريالىق زەرتتەۋمەن راستالۋىنا بايلانىستى جانە وبلىس اۋماعىندا ول ۆيرۋستىڭ تارالۋىنا جول بەرمەۋ ماقساتىندا الماتى وبلىسىنىڭ باس سانيتارلىق دارىگەرى قايرات بايمۇحامبەتوۆ «الماتى وبلىسىندا كوروناۆيرۋس ينفەكتسياسىنىڭ تارالۋىنا جول بەرمەۋ بويىنشا قوسىمشا شارالار قابىلداۋ تۋرالى» قاۋلى قابىلدادى»، - دەپ حابارلايدى وبلىس اكىمدىگىنەن.
اتالعان قاۋلى ەلدىڭ ءتيىستى زاڭناماسىنا سايكەس جانە دەنساۋلىق ساقتاۋ ءمينيسترى مەن الماتى وبلىسىنىڭ اكىمىمەن بەكىتىلگەن «قازاقستان رەسپۋبليكاسىندا كوروناۆيرۋس ينفەكسياسىنىڭ تىركەلۋى مەن تارالۋى كەزىندەگى ارەكەت الگوريتمىنە» ساي قابىلدانعانى حابارلانىپ وتىر.
«قاۋلىدا 15-ناۋرىزدان باستاپ وبلىستىڭ باس مەملەكەتتىك سانيتارلىق دارىگەرىنىڭ ەرەكشە وكىمى شىققانعا دەيىن «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ جۇمىسىن توقتاتۋ تۋرالى ايتىلادى. سونىمەن قاتار قاۋلىعا سايكەس ءوندىرىستىڭ بارلىق نىسانىندا سانيتارلىق- دەزينفەكتسيالىق رەجىم كۇشەيتىلەدى. حالىق كوپ ءارى ۇزاعىنان جينالاتىن عيماراتتاردا قولدى جۋۋعا ارنالعان دەزينفەكسيالىق قۇرىلعىلارمەن بىرگە ارنايى قۇرىلعىلار (سانيتايزەرلەر) ورناتىلادى»، - دەپ حابارلايدى وبلىس اكىمدىگىنىڭ باسپا ءسوز قىزمەتىنەن.
اۆتور: ايان بەكەن ۇلى