اباي لەبى - زاماننىڭ تىنىسى: شەتەلدەگى قازاق ءتىلدى ب ا ق-قا شولۋ

None
None
نۇر-سۇلتان. قازاقپارات- «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

التاي قالاسىنداعى «گەنارال تاۋى شاڭعى كۋرورتى» ءوز جۇمىسىن قايتا باستادى - «التاي اقپارات» سايتى


كوروناۆيرۋستىڭ تارالۋىنا بايلانىستى جابىلعان، قىتايدىڭ التاي قالاسىنداعى «گەنارال تاۋى شاڭعى كۋرورتى» بازاسى 10- ناۋرىز كۇنى ءوز جۇمىسىن قايتا باستادى، - دەپ جازادى altxw.com سايتى.


«التاي قالاسىنداعى «گەنارال تاۋى شاڭعى كۋرورتى» 10- ناۋرىز كۇنى كەلۋشىلەرگە ەسىك اشتى. كۇندەلىكتى جۇمىس ۋاقىتى 10:00 - 19:00- گە دەيىن جانە تۇنگى شوۋ باعدارلاماسى 20:00 - 23:00 ارالىعىندا وتەدى. شاڭعى بازاسىندا كەلگەن ازاماتتار مەن تۋريستەردىڭ قاۋىپسىزدىگىن قامتاماسىز ەتۋ ءۇشىن كۇنىنە ءتورت- بەس رەت كەشەندى دەزينفەكتسيا جۇرگىزىلەدى. الاڭعا كىرۋشىلەر الدىمەن تەمپەراتۋراسىن ولشەتىپ، مەديتسينالىق ماسكا تاعۋى كەرەك. ال قازىرگى ۋاقىتتا بۇل تاۋى شاڭعى كۋرورتى شىڭجاڭداعى تۋريستەر ءۇشىن عانا اشىق»، - دەپ جازادى «التاي اقپارات» سايتى.


ەتنيكالىق قازاق ەلنۇر ابدۋرايموۆ يوردانيادا التىن مەدالعا قول جەتكىزدى - «ءوزا»اقپاراتتىق اگەنتتىگى


بوكستان ازيا قۇرلىعىنان توكيو-2020 وليمپياداسىنا ىرىكتەۋ تۋرنيرىندە ەلنۇر ابدۋرايموۆ التىن مەدالعا قول جەتكىزدى، دەپ جازادى وزبەكستاننىڭ «ءوزا»مەملەكەتتىك اقپاراتتىق اگەنتتىگى. «اقتىق سىندا ەلنۇر قازاقستاندىق زاكىر سافيۋلينگە قارسى قولعاپ ءتۇيىستىرىپ، ءۇش راۋندتىق جەكپە- جەكتە تورەشىلەردىڭ شەشىمىمەن 3:2 ەسەبىمەن جەڭىسكە جەتىپ، ءوز قۇراماسىنىڭ قورجىنىنا ەكىنشى التىن مەدەلدى الىپ بەردى. وسىدان بۇرىن 57 كەلىگە دەيىنگى سالماقتا ميرازيزبەك ميرزاحاليلوۆ يوردانيا قۇراماسىنىڭ بوكسشىسى موحامم ءالۆاديدى جەڭىپ، التىن العان بولاتىن»، - دەپ جازادى «ءوزا»اقپاراتتىق اگەنتتىگى.

ەسكە سالا كەتەيىك، وزبەكستان قۇراماسىنىڭ مۇشەسى، تاشكەنت وبلىسىنىڭ بوستاندىق اۋدانىندا تۋعان ەتنيكالىق قازاق ەلنۇر ابدۋرايموۆ 2015 -جىلى ازيا بىرىنشىلىگىندە جۇلدەگەرلەر قاتارىنان كورىنسە، 2017 -جىلى تاشكەنتتە وتكەن الەم چەمپيوناتىندا التىننان القا تاققان.

مونعوليا مەن قازاقستان ساۋدا- ەكونوميكالىق ىنتىماقتاستىقتى نىعايتادى - KAZNEWS


ق ر- نىڭ ەلشىسى ج. ادىلبايەۆ موڭعوليا پرەزيدەنتىنىڭ ەكونوميكا جانە يندۋستريا ساياساتى جونىندەگى كەڭەسشىسى تس. ەردەنەباتپەن كەزدەسىپ، ساۋدا- ەكونوميكالىق جانە ينۆەستيتسيالىق سالالارداعى ەكىجاقتى ىنتىماقتاستىقتىڭ پەرسپەكتيۆالارىن تالقىلادى، دەپ حابارلايدى kaznews.

مونعوليالىق ب ا ق- تىڭ دەرەگىنە سۇيەنسەك، 2020 -جىلعى 5-ناۋرىزدا وتكەن كەزدەسۋدە، تاراپتار اۋىل شارۋاشىلىعى، ەنەرگەتيكا، تاۋ- كەن ءوندىرىسى، كولىك لوگيستيكاسى جانە اۆياتسيا سالالارىنداعى ساۋدا- ەكونوميكالىق ىنتىماقتاستىقتى ودان ءارى كەڭەيتۋگە مۇددەلى ەكەندەرىن ەرەكشە اتاپ وتكەن. سونىمەن قاتار، قازاقستاندىق وندىرۋشىلەردىڭ كورمەسىن جانە ساۋدا- ەكونوميكالىق، عىلىمي- تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسيانىڭ 8- وتىرىسىن ۇلانباتىردا وتكىزۋ ماسەلەلەرى بويىنشا پىكىر الماسقان.

شىڭجاڭدا قاۋىپتى ىندەت اۋىزدىقتالىپ، قوعامدىق جاعداي قالپىنا كەلە باستادى - تيانشاننەت


شىڭجاڭ- ۇيعىر اۆتونوميالىق ولكەسىندە سوڭعى 24 كۇننەن بەرى كوروناۆيرۋسقا شالدىعۋدىڭ جاڭا جاعدايى تىركەلمەدى، دەپ حابارلايدى «تيانشاننەت» اقپاراتتىق پورتالى.

اتالعان اقپاراتا كوزىنىڭ دەرەگىنە سۇيەنسەك، قازاقستانمەن شەكارادا ورنالاسقان قىتايدىڭ شىڭجاڭ- ۇيعىر اۆتونوميالىق ولكەسىندە 13-ناۋرىز ساعات 24:00-دەگى جاعداي بويىنشا كوروناۆيرۋس اۋرۋىنا جاڭادان شالدىققان ادام جوق ەكەن. شىڭجاڭدا كوروناۆيرۋسقا شالدىعۋدىڭ العاشقى وقيعاسى 23 قاڭتاردا تىركەلگەن بولاتىن. جالپى، مۇندا اۋرۋدى جۇقتىرۋدىڭ راستالعان 76 وقيعاسى انىقتالدى. مۇنىڭ ىشىندە 73 ناۋقاس اۋرۋحانادان ساۋىعىپ شىقسا، ۇشەۋى قايتىس بولعان. ال قازىرگى كۇنى 384 ادام الىدە مەديتسينالىق باقىلاۋدا تۇر.

«وسىنداي ىندەتتىڭ الدىن الۋ شاراسىنىڭ وڭ ناتيجەسىنەن كەيىن، شىڭجاڭدا كوروناۆيرۋس ىندەتىنە بايلانىستى توتەنشە جاعداي دەڭگەيى تومەندەتىلدى. 9-ناۋرىزدان باستاپ، شىنجاڭ ولكەسىنىڭ ورتالىعى ءۇرىمجى قالاسىنداعى اۆتوۆوكزالدار ءوز جۇمىسىنا قايتا كىرىسىپ، 12 قالاعا جولاۋشىلار تاسىمالداي باستادى. سونداي-اق، ۇرىمجىدەگى ءىرى بازارلار مەن ساۋدا- لوگيستيكالىق ورتالىقتارى دا ءوز كليەنتتەرىنە ەسىكتەرىن اشتى. سولاردىڭ ءبىرى ۇرىمجىدەگى حۋاليڭ ساۋدا ورتالىعى 11-ناۋرىزدا بيزنەستى قايتا باستادى. ساقتىق شارالارىنا ساي، ساۋداگەرلەر مەن بازارعا كەلۋشىلەر الدىمەن دەنە تەمپەراتۋراسىن ولشەتكەننەن كەيىن ىشكە كىرە الادى»، - دەپ جازادى «تيانشاننەت».

اتالعان اقپارات كوزىنىڭ دەرەگىنشە، قىتايدا 17-اقپاننان باستاپ مەكتەپتەر ونلاين رەجيمىندە وقىتۋعا كوشكەن بولاتىن. ەندى شىڭجاڭداعى توتەنشە جاعدايدىڭ تۇراقتانۋىنا بايلانىستى، جوعارى وقۋ ورىندارى مەن كوللەدججدەرگە مەملەكەتتىك ەمتيحان تاپسىراتىن 9, 12-سىنىپ وقۋشىلارىنا مەكتەپتە ساباق باستاۋ 16-ناۋرىزعا جوسپارلانعان.

اباي لەبى - زاماننىڭ تىنىسى - «ءوزا» اقپاراتتىق اگەنتتىگى


قازاقتىڭ ماڭدايىنا بىتكەن ءبىرتۋار تۇلعا اباي قۇنانباي ۇلىنىڭ 175 جىلدىق مەرەيتويىن تويلاۋ جەر بەتىندەگى قازاقپىن دەگەن حالىققا ورتاق شارا، دەپ جازادى وزبەكستاننىڭ «ءوزا»مەملەكەتتىك اقپاراتتىق اگەنتتىگى. اتالعان ب ا ق- تىڭ جازۋىنشا، وسىنداي يگى ءىس- شارانىڭ ءبىرى وزبەكستان جەرىندە قونىس تەپكەن قازاق قاۋىمىنىڭ اراسىندا، تاشكەنت وبلىسى، قىبىراي اۋدانىنداعى №9-جالپى ورتا ءبىلىم بەرەتىن مەكتەپتە جوعارى دەڭگەيدە وتكەن. اۋداندىق قازاق مادەني ورتالىعىنىڭ ءتوراعاسى جاقسىلىق ورازبايەۆتىڭ باستاماسىمەن ۇيىمداستىرىلعان «ارتىندا ولمەيتۇعۇن ءسوز قالدىرعان» اتتى ادەبي كەشكە، تاشكەنت وبلىستىق قازاق مادەني ورتالىعىنىڭ ءتوراعاسى ءدامىر قالدىبايەۆ جانە سول ەلدەگى تانىمال قازاق قالامگەرلەرى بوران قىدىروۆ، مەكەمباي وماروۆ، قۇلماحان دۇيسەنوۆ سەكىلدى بەلگىلى تۇلعالار قاتىسقان.


«ادەبي سازدى كەشكە ءاربىر مەكتەپ وقۋشىسى ارنايى دايىندىقپەن كەلگەن. ويتكەنى ولاردىڭ اباي مۇراسىنان «كوزىمنىڭ قاراسى»، «جەلسىز تۇندە جارىق اي»، «ايتتىم سالەم قالامقاس» اندەرىن قۇيقىلجىتا شىرقاعانى، «تاتيانانىڭ حاتى» ولەڭى مەن «ەسكەندىر» پوەماسىنا ارنالعان ساحنالىق قويىلىمى بارشا كورەرمەنگە ۇنادى. ايتۋلى شارادا بىلىكتى ۇستازدار قاۋىمىنا قازاق مادەني ورتالىعىنىڭ سىيلىقتارى جانە العىس حاتتارى تابىستالدى.

مەكتەپتەردەگى كىتاپ قورىن تولىقتىرۋ ماقساتىندا قاتىسۋشىلار جەكە كىتاپقورىنان ءوز كىتاپتارىن وقىتۋشىلارعا تارتۋ ەتتى. بۇل بارلىعىنا تاپتىرماس سىيلىق بولدى»، - دەپ جازادى «ءوزا»اقپاراتتىق اگەنتتىگى.

يبراحيم ەرەنگە شىڭعىس ايتماتوۆ اتىنداعى تۇرىكسوي مەدالى تابىس ەتىلدى - TRT


تۇركيا راديو جانە تەلەديدار باسقارماسى (ت ر ت) باس ديرەكتورى يبراحيم ەرەن تۇرىك مادەنيەتىنىڭ حالىقارالىق ۇيىمى تۇرىكسوي تاراپىنان «تۇركى الەمىنىڭ مادەني تۇتاستىعىنا قوسقان ۇلەسىنە» وراي «شىڭعىس ايتماتوۆ التىن مەدالىنە» لايىقتى دەپ تابىلدى، دەپ جازادى تۇركيا راديو تەليەۆيزيا پورتالى. اتالعان ب ا ق- تىڭ جازۋىنشا، يبراحيم ەرەن تۇرىكسوي عيماراتىندا ۇيىمداستىرىلعان ماراپات راسىمىندەگى سوزىندە وسىنداي قىمباتتى مەدالدى العانىنا ماقتانىش سەزىنەتىنىن ايتقان. سونداي-اق، ت ر ت سوۆەت وداعى ىدىراعان 1990 -جىلداردان بەرى تۇركىستان جانە تۇرىك- يسلام گەوگرافياسىندا ءوز وكىلدىكتەرىن اشقانىن ەسكە سالعان. سونىمەن بىرگە ول سوڭعى جىلداردا 14 تەلەديدار جانە 16 راديو ارناسى بار ت ر ت-نىڭ الەمدەگى ەڭ ءىرى مەملەكەتتىك اقپارات ورتالىقتارىنىڭ بىرىنە اينالعانىن اتاپ وتكەن.

ت ر ت-نىڭ ىنتىماقتاستىعىمەن تۇرىكسوي-دىڭ تۇركى الەمىنىڭ تىلىنە، مادەنيەتىنە جانە ونەرىنە قوسقان ۇلەسى تەڭدەسىز ەكەنىن ايتقان ەرەن: «تۇركىستان گەوگرافياسى مەن انادولىنىڭ قارىم- قاتىناستارىن جانداندىرۋ جانە سانالاردى وياتۋ ماقساتىمەن باعدارلاما، سەريال جانە دەرەكتى فيلمدەر جاساۋدامىز جانە مۇنى جالعاستىرامىز» دەدى.

«تۇرىكسوي باس حاتشىسى دۇيسەن قاسەيىنوۆ تۇرىكسوي-دىڭ بابالاردان قالعان باي مادەني مۇرالاردى جانداندىرۋ، الەمگە تانىستىرۋ جانە بولاشاق ۇرپاقتارعا جالعاۋ ماقساتىمەن الەمدەگى تۇرلىشە ەلدەردە ءىس- شارالاردى جالعاستىرىپ جاتقاندارىن ايتتى. دۇيسەن قاسەيىنوۆ شيرەك عاسىردان استام ۋاقىتتان بەرى تۇرىكسوي-دىڭ ءىس- شارالارىنا ت ر ت-نىڭ ءارقاشان قولداۋ بەرگەنىن اتاپ كورسەتتى. باياندامالاردان كەيىن دۇيسەن قاسەيىنوۆ يبراحيم ەرەنگە مەدال مەن شىڭعىس ايتماتوۆ البومىن تابىس ەتتى»، - دەپ جازادى TRT.

اۆتور: باقىتجول كاكەش

سوڭعى جاڭالىقتار