قازاقستاندىقتارعا قاتتى الاڭداۋدىڭ قاجەتى جوق - ەلجان ءبىرتانوۆ

None
None
نۇر- سۇلتان. قازاقپارات - دەنساۋلىق ساقتاۋ ءمينيسترى ەلجان ءبىرتانوۆ ەلىمىزدە كوروناۆيرۋس ينفەكسياسىنىڭ تىركەلۋىنە بايلانىستى قازاقستاندىقتارعا قاتتى الاڭداۋدىڭ قاجەتى جوقتىعىن ءمالىم ەتتى، دەپ حابارلايدى قازاقپارات ءتىلشىسى.

«ءبىز باستاپقىدا بۇل جاڭا شتام - جاڭا كوروناۆيرۋس ەكەنىن ايتقان ەدىك. بۇل الەمدە بۇرىن اشىلعان شتامداردان وزگەشە. تيىسىنشە، اۋرۋدىڭ بەلگىسى دە ءارتۇرلى. سوندىقتان ءبىز د د س ۇ- دان، ينفەكسيا تىركەلگەن ەلدەردىڭ دەنساۋلىق ساقتاۋ مينيسترلىكتەرىنەن اقپارات الامىز.

بىزدە بار مالىمەتتەر وسىنداي سيپاتقا يە: پاتسيەنتتەردىڭ باسىم بولىگى سيمپتومسىز، جۇمساق وتكەرىپ، ەمدەۋدى قاجەت ەتپەيدى. قازىر كوروناۆيرۋس ينفەكسياسىمەن بەتپە- بەت كەلگەن كوپتەگەن ەلدىڭ حاتتامالارىندا ولار، نەگىزىنەن، ۇيىندە كارانتينگە جاتادى. ياعني، جەڭىل بەلگىلەرىمەن اۋرۋحاناعا جاتۋدىڭ قاجەتى جوق. بۇل سپەسيفيكالىق تۇرعىدا ەمدەۋدىڭ قاجەتى جوقتىعىن بىلدىرەدى»، - دەدى ەلجان ءبىرتانوۆ و ك ق- دا وتكەن باسپا ءسوز ءماسليحاتىندا.

مينيستر كەز كەلگەن اۋرۋ سياقتى، كوروناۆيرۋس ينفەكسياسىن جۇقتىرۋدىڭ قالىپتى جانە اۋىر دارەجەسى بولۋى مۇمكىن ەكەنىن اتاپ ءوتتى. بۇل نەگىزىنەن اعزانىڭ يممۋندىق جۇيەسىنىڭ كۇيىنە، سوزىلمالى اۋرۋلاردىڭ بولۋىنا بايلانىستى.

«سوندىقتان ءبىز قازاقستاندىقتارعا قاتتى الاڭداۋدىڭ قاجەتتىگى جوقتىعىن ايتقىم كەلەدى. بۇل - رەسپيراتورلىق ۆيرۋستىق ينفەكسيا. ول ءارتۇرلى قالىپتا بولادى. ايتالىق، تۇماۋ - ءسال اۋىر ءتۇرى. كوبىرەك سۋ ءىشىپ، مازا كەتسە قابىنۋعا قارسى پرەپاراتتار قابىلداۋ كەرەك. ەگەر جوعارى تەمپەراتۋرا، جوتەل سياقتى اۋىر بەلگىلەر بايقالسا، جەدەل جاردەم شاقىرۋ كەرەك»، - دەدى مينيستر.

ەسكە سالا كەتسەك بۇعان دەيىن دەنساۋلىق ساقتاۋ ءمينيسترى ەلجان ءبىرتانوۆ قازاقستاننىڭ ەكى ازاماتىنان كوروناۆيرۋس ينفەكسياسى تابىلعانىن ءمالىم ەتكەن ەدى.

اۆتور: ايان بەكەن ۇلى

سوڭعى جاڭالىقتار