بوكسشىلار قازاق ەلىنىڭ ءۇمىتىن اقتادى - ۇلتتىق قۇرامانىڭ باس باپكەرى

None
None
اممان. قازاقپارات - يوردانيانىڭ اممان قالاسىندا وتكەن بوكستان وليمپياداعا ىرىكتەۋ تۋرنيرى ءوز مارەسىنە جەتتى.

جارىس اياقتالا سالىسىمەن بوكستان ۇلتتىق قۇرامانىڭ باس باپكەرى عالىمبەك كەنجەبايەۆ قازاقپارات تىلشىسىنە سۇحبات بەرىپ، وليمپادالىق ىرىكتەۋ تۋرنيرى تۋرالى ءوز پىكىرىمەن ءبولىستى.

- عالىمبەك قالي ۇلى، وليمپيادالىق ىرىكتەۋ تۋرنيىرىن ءساتتى اياقتادىڭىزدار. كوڭىل-كۇيىڭىز قالاي؟

- وتە تاماشا! سەنىم ارتقان سەركەلەرىمنىڭ بارلىعى مەنىڭ عانا ەمەس، جالپى قازاق ەلىنىڭ ءۇمىتىن اقتادى. 8 بوكسشى الىپ كەلدىم، بارلىعى وليمپياداعا جولداما جەڭىپ الدى.

- ءسىز وسىعان دەيىنگى ءبىر سۇحباتىڭىزدا 6 جولداما الساق دەپ جوسپارلاعانىڭىزدى ايتىپ قالىپ ەدىڭىز. جوسپارىڭىز ارتىعىمەن ورىندالدى...

- ءيا، ءارقاشان ارىق ايتىپ، سەمىز شىققانعا نە جەتسىن. وزدەرىڭىز دە جارىستى تىكەلەي ەفيردەن كورىپ جاتقان بولارسىزدار. ەشقانداي وسال قارسىلاسىمىز بولعان جوق. بارلىعى «سەن تۇر، مەن اتايىن» دەگەن بوكسشىلار بولدى. ءبىراق، ءبىزدىڭ جىگىتتەر وليمپيادا ليتسەنزياسى ءۇشىن ايانىپ قالعان جوق. بارىن سالدى. سونىڭ ناتيجەسىندە وليمپياداعا تولىق قۇرامدا بارۋعا مۇمكىندىك الدىق.

- مەدال ءۇشىن ايقاستا كەيبىر بوكسشىلارىمىز جولداماعا قول جەتكىزگەننەن كەيىن، ماقسات ورىندالدى دەپ بوساڭسىپ كەتكەن جوق پا؟

- مەن ولاردىڭ باپكەرى رەتىندە ولاي ەسەپتەمەيمىن. بارلىعى دا مەدال ءۇشىن شاما كەلگەنشە جۇدىرىقتاستى. نەگىزى، 63 كەلى سالماقتا زاكىر سافيۋللين فينالدا قارسىلاسىنان ءبىر ءباس جوعارى تۇسكەندەي بولدى. ءبىراق، تورەشىلەر ونىڭ قارسىلاسىن جەڭىمپاز دەپ تاپتى. ەگەر سافيۋللين جەڭىسكە جەتكەندە جالپى كوماندالىق ەسەپتە وزبەكستاندى باسىپ وزىپ، ءبىرىنشى ورىنعا كوتەرىلەر ەدىك. ءبىراق، بۇل وليمپيادا ويىندارى ەمەس، ىرىكتەۋ تۋرنيرى عانا. سوندىقتان، بۇيىرماعان مەدالعا بولا قاپا بولۋدىڭ قاجەتى شامالى. ەسەسىنە، وليمپيادا ويىندارىنا دەيىن قاي جەردەن قاتەلىك جىبەرگەنىمىزدى پىسىقتاپ، سول قاتەلىكتەرمەن جۇمىس ىستەۋىمىز كەرەك.

- 75 كەلى سالماقتا ەل نامىسىن قورعاعان ءابىلحان امانقۇلدىڭ فينالداعى ايقاسىنا قانداي باعا بەرەسىز؟

- ءابىلحان امانقۇل وتكەن جىلى جاراقاتىنا بايلانىستى كوپتەگەن جارىستارعا قاتىسقان جوق. وزدەرىڭىز بىلەسىزدەر، بىلتىر وسى سالماقتا رەسەيدە وتكەن الەم بىرىنشىلىگىنە تۇرسىنباي قۇلاحمەت قاتىسقان بولاتىن. امانقۇل ءبىر جىلدىق ۇزىلىستەن كەيىن وسى وليمپيادالىق ىرىكتەۋ تۋرنيرىنە شىعىپ وتىر. سوندا دا وليمپياداعا جولداما الىپ قانا قويماي، فينالعا دەيىن جەتتى. بۇل جامان كورسەتكىش ەمەس. ەندى، وليمپياداعا دەيىن قاتەلىكتەرمەن جۇمىس ىستەيمىز.

- 81 كەلى سالماقتا اتالعان تۋرنيردە قازاق بوكسشىلارى اراسىنان العاشقى التىندى جەڭىپ العان بەكزات نۇرداۋلەتتىڭ جەكپە-جەكتەرىنە باعاڭىز...

- بەكزات - جاس بوكسشى. جاس بولا تۇرا وتكەن جىلى الەم بىرىنشىلىگىندە ءوز سالماعىندا قارسىلاس شاق كەلتىرمەي، چەمپيون اتاندى. جانە، بۇگىن سول جەڭىسىنىڭ كەزدەيسوق ەمەستىگىن تاعى ءبىر دالەلدەپ، باس جۇلدەنى جەڭىپ الدى. جالپى، بولاشاعىنان ۇلكەن ءۇمىت كۇتتىرەتىن بوكسشىلارىمىزدىڭ ءبىرى دەپ سانايمىن.

- ريو-دە-جانەيروداعى وليمپيادانىڭ كۇمىس جۇلدەگەرى 91 كەلى سالماقتا ەل نامىسىن ابىرويمەن قورعاپ جۇرگەن ۆاسيلي لەۆيتتىڭ كوپتەگەن جارىستاردا فينالدا جولى كەسىلە بەرەتىنى تۋرالى كوپشىلىك قاۋىم ءجيى ايتىپ ءجۇر. الايدا، بۇل جولى باس جۇلدەگە كۇمانسىز قول جەتكىزدى. بۇل تۋرالى نە ايتار ەدىڭىز؟

- لەۆيت - قۇراماداعى اسا تاجىريبەلى، ساقا بوكسشىلاردىڭ ءبىرى. ءبىز ونىڭ ءاۋ باستا جولداماعا يەلىك ەتەتىنىنە سەنىمدى بولدىق. سونداي-اق جەڭىمپاز بولارىنا دا كۇمان كەلتىرگەن جوقپىز. وزدەرىڭىز كورگەندەي، قورجىنىمىزعا ەكىنشى التىن جۇلدەنى سىيلادى. ەندى، لەۆيتكە ريودا كەتكەن ەسەنى قايتارىپ، چەمپيون بولۋ قالدى. بۇل جولى بارلىق قارسىلاسىن كۇمانسىز ۇتتى.

- قاي بوكسشىلاردىڭ جۇدىرىقتاسۋىنا كوڭىلىڭىز تولعان جوق؟

- نەگىزى، بارلىعى كەرەمەت جۇدىرىقتاستى. ەشقايسىسىن بولە جارعىم كەلمەيدى. ەڭ باستىسى، وليمپياداعا تولىق قۇرامدا جولداما ۇتىپ الدىق. ءبىزدىڭ ماقساتىمىز دا سول بولاتىن. ءبىز ماقاتتى 100 پايىز ورىنداي الدىق. الايدا، اراسىندا كەمشىلىكتەرىمىز دە بولدى. ءبىز ەندى وليمپيادا ويىندارىنا دەيىن قاتەلىكتەرمەن جۇمىس ىستەيمىز. ەندىگى ماقسات - وليمپيادا ويىندارىندا توپ جارۋ.

- اڭگىمەڭىزگە راحمەت! ماقساتتارىڭىز ورىندالا بەرسىن...

اۆتور: كۇنسۇلتان وتارباي

سوڭعى جاڭالىقتار