توكيوعا كۆاليفيكاتسيالىق جارىس: بەكزات نۇرداۋلەتوۆ چەمپيون بولدى

اممان. قازاقپارات - يوردانيانىڭ اممان قالاسىندا ءوتىپ جاتقان بوكستان وليمپياداعا ىرىكتەۋ تۋرنيرىندە بەكزات نۇرداۋلەتوۆ قازاق بوكسشىلارى اراسىنان العاشقى «التىندى» جەڭىپ الدى، دەپ حابارلايدى قازاقپارات ءتىلشىسى.

81 كەلى سالماقتا ەل نامىسىن قورعاعان وتانداسىمىز بەكزات ازيا-تىنىق مۇحيتى ايماعىنان وليمپياداعا ىرىكتەۋ تۋرنيرىنىڭ چەمپيونى اتاندى.

ول فينالدا اۆستراليالىق بوكسشى پاۋلو اوكۋسومەن قولعاپ ءتۇيىستىردى. ءۇش راۋند قورىتىندىسى بويىنشا تورەشىلەر قازاق بوكسشىسىن ءبىراۋىزدان جەڭىمپاز دەپ تاپتى. ەسەپ - 5:0.

وسىلايشا، بەكزات قازاقستاندىق بوكسشىلار اراسىنان وليمپيادالىق ىرىكتەۋ تۋرنيرىندە ءبىرىنشى بولىپ توپ جاردى.

بۇعان دەيىن فينالعا شىققان ەكى بوكسشىمىز - زاكىر سافيۋللين مەن ءابىلحان امانقۇل «كۇمىستى» قاناعات تۇتقان ەدى.

ازداعان ۋاقىتتان سوڭ رينگكە ۆاسيلي لەۆيت شىعىپ، التىن مەدال ءۇشىن تالاساتىن بولادى.

اۆتور: كۇنسۇلتان وتارباي