قازاقستاندا «ورالمان» ۇعىمى قولدانىستان شىعارىلادى

نۇر- سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى- قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

اتالعان زاڭ جوباسىنىڭ ءبىرىنشى وقىلىمى 2019 -جىلعى 11 - جەلتوقساندا بولدى.

تالقىلاۋ بارىسىندا دەپۋتاتتار تاراپىنان ايتىلعان پىكىرلەر ەسكەرىلە وتىرىپ، زاڭ جوباسى ودان ءارى جەتىلدىرىلدى. زاڭ جوباسىمەن 9 كودەكسكە جانە 21 زاڭعا وزگەرىستەر مەن تولىقتىرۋلار ەنگىزۋ كوزدەلىپ وتىر.

«جاعىمسىزداۋ اتاۋعا اينالعان «ورالمان» ءسوزىنىڭ ورنىنا، الداعى ۋاقىتتا «قانداس» اتاۋى قولدانىلاتىن بولادى. قانداستارىمىزعا ەلىمىزدە تۇراقتى تۇرۋعا رۇقسات الۋ جانە قازاقستان ازاماتتىعىن الۋ ءۇشىن قۇجاتتاردى ءبىر مەزگىلدە تاپسىرۋ مۇمكىندىگىن بەرۋ قاراستىرىلىپ وتىر. بۇعان دەيىن ولار ەكى رەت قۇجات جيناپ تاپسىرۋعا ءماجبۇر ەدى. سونداي- اق ەلىمىزدە 183 كۇننەن كەم تۇرۋ جانە اكىمشىلىك قۇقىقبۇزۋشىلىقتاردىڭ بولۋى بويىنشا زاڭنامالىق نورمالار قولدانىلمايتىن ادامدار ساناتىنا ەتنيكالىق قازاقتاردى قوسۋ كوزدەلىپ وتىر. بۇل تۇزەتۋدە قانداستارىمىزدىڭ قازاقستان ازاماتتىعىن الۋىن جەدەلدەتۋگە سەپتىگىن تيگىزەدى»، - دەيدى دەپۋتات كارىباي مۇسىرمان زاڭ جوباسى بويىنشا بايانداما جاساي وتىرىپ.

سونىمەن قاتار دەپۋتات شەتەل ازاماتتارىن قازاقستان اۋماعىنان شىعارۋ ءتارتىبىن جەڭىلدەتۋ قادامىنا توقتالدى.

«دەپۋتاتتار ەشقانداي قۇجاتى جوق شەتەلدىك ازاماتتاردى ەلدەن شىعارۋعا مۇمكىندىك بەرەتىن جول ءجۇرۋ قۇجاتىن ەنگىزۋدى ۇسىندى. سەبەبى سوتتاردىڭ شەشىمىمەن ەلدەن شىعارىلۋعا ءتيىستى جۇزدەگەن شەتەلدىك ەشقانداي جارامدى قۇجاتىنىڭ بولماۋىنا بايلانىستى قازاقستان اۋماعىنان شىعارىلماي، پوليتسيانىڭ قابىلداۋ ورىندارىندا مەملەكەتتىك بيۋدجەت ەسەبىنەن تەگىن تۇرىپ جاتىر»، - دەدى ك. مۇسىرمان.

ەسكە سالا كەتەيىك، بيىل قىركۇيەك ايىندا مەملەكەت باسشىسى قاسىم- جومارت توقايەۆ «ورالمان» سوزىنەن باس تارتىپ، «قانداس» دەگەنىمىز ءجون بولاتىنىن ايتقان ەدى.

«مەن بۇدان بۇرىن دا تاريحي وتانىنا كەلگەن قازاقتاردى «ورالمان» دەپ اتاۋدان باس تارتىپ، «قانداس» دەگەنىمىز ءجون بولادى دەگەن ەدىم. جەتى اتاسىن بىلەتىن حالىققا «قانداس» دەگەن ۇعىم جاراسادى»، - دەگەن پرەزيدەنت.

اۆتور: رۋسلان عابباسوۆ