قىزىلوردالىق ونەرتاپقىشتار ساداق اتۋدىڭ ونلاين نۇسقاسىن جاسادى

قىزىلوردا. قازاقپارات - قىزىلوردادا جاس ونەرتاپقىشتار ساداق اتۋ ويىنىنىڭ ۆيرتۋالدى ۇلگىسىن جاساپ شىعاردى، دەپ حابارلايدى قازاقپارات ءتىلشىسى.

مۇنداي كومپيۋتەرلىك ويىن قىزىلوردادا العاش رەت جاسالىپ وتىر. جەرگىلىكتى ابىلايحان كوللەدجىندە وقيتىن ابىلايحان قارساقباي، اعايىندى سۇلتان مەن بەك قازي وسىلايشا جاڭاشىل ىسىمەن وزدەرىن جاقسى قىرىنان تانىتا ءبىلدى.

3د ۇلگىسىندە ازىرلەنگەن تۋىندى ماماندار تاراپىنان جوعارى باعاعا يە بولدى. بۇل ويىندى دايىنداۋعا ولاردىڭ 4 ايعا جۋىق ۋاقىتى كەتكەن.

«قازىر ينتەرنەت ارقىلى كوپتەگەن ويىنداردى كورۋگە بولادى. وعان قۇمار جاس ورەندەر كوپ. دەسە دە وندا قازاقتىڭ ۇعىمىنا ساي كەلەتىنى ساۋساقپەن سانارلىق. ءتىپتى، جوق دەسەك تە بولادى. مەنى جانە بىرگە وقيتىن دوستارىمدى وسى ماسەلە ويلاندىراتىن. ويلاسا كەلە ءبىر شەشىمگە كەلدىك. ۇلتتىق ويىنداردى جاساۋعا نازار اۋدارعاندى ءجون كوردىك. جاڭا جوبامىز وسىلايشا ومىرگە ەندى. ونى جاساۋ بارىسىندا بارلىق ۇساق- تۇيەكتى ۇمىت قالدىرماۋعا تىرىستىق. ماقساتىمىز ءوز ناتيجەسىن بەردى. ساداق تارتۋ ويىنى كورگەن ادامداردى وزىنە باۋراي ءتۇستى. وسى سالادا جەمىستى ەڭبەك ەتىپ جۇرگەن جەرگىلىكتى عالىمدار مەن مامانداردىڭ اقىل- كەڭەسىنە قۇلاق تۇردىك. ولار وزدەرىنىڭ جوعارى باعاسىن بەردى»، - دەدى ابىلايحان.

جاس ونەرتاپقىشتىڭ ايتۋىنشا، كومپيۋتەرلىك ويىندى جاساۋ ارنايى باعدارلامالار بويىنشا ازىرلەنگەن. بۇل باعىتتا ويىنداردى وڭدەۋ قۇرالى پايداسىن تيگىزدى.

«بۇگىندە ونى كومپيۋتەردەگى ۆيرتۋالدى ويىندار تىزىمىنە ەنگىزۋ باعىتىندا ءتيىستى ءىس- شارالار جۇرگىزىپ جاتىرمىز. ونىڭ ءوز تالاپتارى بار. الەمدە بۇل باعىتتا قىزمەت اتقارىپ جاتقان كومپانيالار بار. ءبىز سول كومپانيالار ارقىلى ءوز جوبامىزدى كەڭىنەن ناسيحاتتاۋعا كوڭىل بولدىك. ءبىز تەك ساداق تارتۋمەن عانا شەكتەلىپ قالعىمىز كەلمەيدى. الدا ۇلكەن جوبالار كۇتىپ تۇر. ەندى سول باعىتتا جۇمىس جۇرگىزسەك دەگەن ويىمىز بار. اتاپ ايتقاندا، توعىزقۇمالاق، اسىق اتۋ، كوكپار سەكىلدى قازاقتىڭ ۇلتتىق ويىندارىن ناسيحاتتاۋ جوسپاردا بار. وسىلايشا كومپيۋتەر مەن ۇيالى تەلەفونعا ۇڭىلگەن جاستارعا سول ارقىلى ۇلتتىق ويىنداردى ۇيرەتسەك دەيمىز. ولاردى VR عانا ەمەس، كومپيۋتەرگە دە، ۇيالى تەلەفونعا دا شىعارۋ ويىمىزدا بار»، - دەدى ابىلايحان.

قازىرگى تاڭدا كوللەدجدە ەسەپتەۋ تەحنيكاسى جانە باعدارلامالىق قامتاماسىز ەتۋ ماماندىعى بويىنشا ءبىلىم الىپ جاتقان جاستار اراسىندا ءتۇرلى جوبالاردى جۇزەگە اسىرىپ جۇرگەن ونەرتاپقىش ورەندەر بارشىلىق.

اتاپ ايتقاندا، سەرجان جۇماجانوۆ كوللەدج ستۋدەنتتەرىنە ارنالعان Telegram-بوت باعدارلاماسىن جاساۋ ۇستىندە. ال، ءبىر توپ ستۋدەنتتەر «مۇمكىندىگى شەكتەۋلى بالالارعا ارنالعان» ويىنشىق قۇراستىرۋعا كوڭىل ءبولىپ وتىر.