ديماش قۇدايبەرگەن ريگادا كونسەرت بەردى

ريگا. قازاقپارات - الەمگە تانىمال قازاقستاندىق ءانشى ديماش قۇدايبەرگەن ءوزىنىڭ كەزەكتى تاڭعالارلىق شوۋ كونسەرتىن لاتۆيا استاناسى ريگادا وتكىزدى، دەپ حابارلايدى قازاقپارات ءتىلشىسى.

« Thank you Latvia. Liels paldies . راحمەت، لاتۆيا»، - دەپ جازدى ديماش قۇدايبەرگەن ريگاداعى كونسەرتتەن كەيىن ءوزىنىڭ Instagram پاراقشاسىندا اعىلشىن، لاتىن جانە قازاق تىلدەرىندە. بۇل - ورىنداۋشىنىڭ ەۋروتۋر اياسىنداعى ءتورتىنشى كونسەرتى. بۇعان دەيىن ديماشتىڭ كونسەرتتەرى كراسنودار، قازان جانە ەكاتەرينبۋرگتە وتكەن بولاتىن. ءانشىنىڭ Instagam-داعى پوستىنا بىرنەشە ساعات ىشىندە مىڭنان استام جانكۇيەرلەرى ونىڭ كەرەمەت ورىنداۋشىلىق شەبەرلىگىنە العىستارىن ءبىلدىرىپ، پىكىر قالدىرعان.

«ديماش، ءسىز تاعى دا كونسەرتىڭىزگە كەلگەن مىڭداعان ادامعا قۋانىش سىيلادىڭىز. مەن ءسىزدى ۇلكەن جەتىستىگىڭىزبەن قۇتتىقتايمىن. ءسىز تاڭعاجايىپ، كەرەمەت، اسەرلى جانسىز ... ءسىزدى سيپاتتايتىن سىن ەسىمدەر جەتكىلىكسىز، ءسىز سونشالىقتى كەرەمەتسىز، ءبىز سىزگە نە ايتۋ كەرەكتىگىن دە بىلمەيمىز، ءبىراق ءبىز سىزگە راحمەت ايتۋدان ەشقاشان شارشامايمىز، بىزگە بەرگەن ءار ءساتىڭىز، بارلىق كۇش- جىگەرىڭىز، كۇش- قۋاتىڭىز، مەيىرىمدىلىگىڭىز ءۇشىن راحمەت... الەمگە ءوزىڭىزدىڭ كەرەمەت دارىنىڭىزدى كورسەتكەنىڭىز ءۇشىن راحمەت، اندەرىڭىز ارقىلى بىزگە ءوزىڭىزدىڭ قىمبات مادەنيەتىڭىزدى كورسەتكەنىڭىز ءۇشىن العىس ايتامىز.. .» ، - دەپ تىلەگىن ءبىلدىردى ورىنداۋشىعا يسپانيادان كەلگەن جانكۇيەرى.

dimashnews.com مالىمەتىنشە، اڭىزعا اينالعان «ريگا ارەناسى» ستاديونىنا الەمنىڭ 30-دان استام ەلىنەن جانكۇيەرلەر جينالعان. ولاردىڭ كوپشىلىگى Instagam-نان تىكەلەي ەفيرگە شىققان. سونىڭ ارقاسىندا كورەرمەندەر سانى ارتقان. بۇدان بولەك، فاناتتارى ريگاداعى كونسەرتتىڭ ۆيدەوسىمەن بولىسكەن.

ەرتەڭ، 9 - ناۋرىزدا، ديماش قۇدايبەرگەن ماسكەۋدە، 11 - ناۋرىزدا كيەۆتە، 19- ناۋرىز گامبۋرگتە، 21 - ناۋرىز ديۋسسەلدورفتا، 25 - ناۋرىز پراگادا، 29 - ناۋرىز شتۋتگارتتا جانە 4 - ءساۋىر مينسكتە ونەر كورسەتەدى. بۇعان دەيىن حابارلاعانداي، Arnau tour اياسىندا ديماش 11 كونسەرت بەرەدى.