بوكسشى ريمما ۆولوسەنكو وليمپيادا ويىندارىنا ىرىكتەۋ تۋرنيرىندە قارسىلاسىنان ۇتىلدى

نۇر-سۇلتان. قازاقپارات - بۇگىن اممان قالاسىندا (يوردانيا) بوكستان ءوتىپ وليمپيادا ويىندارىنا ىرىكتەۋ تۋرنيرىندە قازاقستاندىق ەكىنشى قىزىمىز جارىستى ەرتە اياقتادى، دەپ حابارلايدى قازاقپارات ءتىلشىسى.

وليمپياداعا ىرىكتەۋ تۋرنيرىندە ايەلدەر اراسىنان ەكىنشى بولىپ رينگىگە 60 كەلى سالماقتا قازاقستاندىق ريمما ۆولوسەنكو شىقتى. ول ءۇندىستاندىق سيمراندجيتكاۋر بااتپەن جۇدىرىقتاسىپ، وكىنىشكە قاراي قارسىلاسىنا جول بەردى. وسىلايشا ايەلدەر بوكسىنان ەكىنشى ارۋىمىز جارىس جولىن ەرتە اياقتادى.

ەرىك العابەك جاتتىقتىراتىن ايەلدەر كومانداسىنىڭ ەكىنشى بوكسشىسى جولىنان شىعىپ قالدى. بۇعان دەيىن تاعى ءبىر بوكسشىمىزدىڭ العاشقى جەكپە-جەگىندە قارسىلاسىنا جول بەرگەنى تۋرالى جازعان بولاتىنبىز.

بۇگىن، ياعني 5- ناۋرىزدا ەرلەر اراسىنداعى جەكپە-جەكتەر باستالادى. ەرلەر اراسىنان العاشقى بولىپ زاكير سافيۋللين (63 كەلى) يراك جانە قىتاي بوكسشىلار اراسىنداعى جەكپە-جەكتىڭ جەڭىمپازىمەن جۇدىرىقتاسادى. ودان كەيىن ءابىلحان امانقۇل (75 كەلى) كورەيالىق جانە تاجىكستاندىق سپورتشىلار اراسىنداعى جەكپە-جەكتىڭ جەڭىمپازىمەن قولعاپ تۇيىستىرەدى. ال بەكزات نۇرداۋلەتوۆ (81 كەلى) جاڭا زەلانديا-جاپونيا بوكسشىلارى اراسىنداعى جەكپە-جەكتىڭ جەڭىمپازىمەن كەزدەسەدى.

اۆتور: كۇنسۇلتان وتارباي