قىتاي ونىمدەرىنە شەكتەۋ ىشكى نارىققا اسەر ەتپەيدى

نۇر- سۇلتان. قازاقپارات - كوروناۆيرۋستىڭ تىركەلۋىنە بايلانىستى وتكەن ايدا كەيبىر قىتايلىق تاۋارلاردىڭ يمپورتى ۋاقىتشا توقتاتىلدى.

مىسالى، قىتايدان ءتىرى بالىق جانە بالىق ونىمدەرىن اكەلۋگە جانە قازاقستان اۋماعى ارقىلى تاسىمالداۋعا شەكتەۋ قويىلعان. يمپورتتىڭ ازايۋى ىشكى نارىققا قالاي اسەر ەتەدى؟ قىتايلىق جەمىس- جيدەكتىڭ ورنىن قاي ەلدىڭ تاۋارى الماستىرادى؟

ەلىمىزدىڭ اۋىل شارۋاشىلىعى مينيسترلىگىنىڭ حابارلاۋىنشا، مال شارۋاشىلىعى ونىمدەرىنە ەنگىزىلگەن تىيىم ىشكى نارىققا اسەر ەتپەيدى. كوروناۆيرۋس سالدارىنان بيىل 29 - قاڭتاردا قىتايدان ءتىرى بالىق جانە بالىق ونىمدەرىن اكەلۋگە ۋاقىتشا شەكتەۋ ەنگىزىلدى. دەگەنمەن، يمپورت كولەمىنىڭ ايتارلىقتاي كوپ بولماۋىنان بۇل تىيىم ىشكى نارىققا اسەر ەتپەيدى. ەلىمىزدىڭ اۋىل شارۋاشىلىعى مينيسترلىگىنىڭ باسپا ءسوز قىزمەتى وسىلاي دەپ حابارلادى.

وتكەن جىلى قىتايدان كەلگەن اۋىل شارۋاشىلىعى ونىمدەرى يمپورتتىڭ تەك % 5- ءىن قۇراعان. اقشالاي كورسەتكىشتە بۇل 193 ميلليون دوللاردان استام قاراجات. ال وسىمدىك شارۋاشىلىعى ونىمدەرى يمپورتىنىڭ كولەمى 192 مىڭ توننا توڭىرەگىندە.

كورشى ەلدەن نەگىزىنەن سيترۋستى جەمىستەر، شابدالى، ءجۇزىم جانە بۇرىش اكەلىنەدى. مينيسترلىكتىڭ حابارلاۋىنشا، ىندەتتىڭ تارالۋى وسىمدىك شارۋاشىلىعى ونىمدەرىن تاسىمالداۋعا شەكتەۋ قويىلعان جاعدايدا، ونىڭ ىشكى ازىق- تۇلىك نارىعىنا ەلەۋلى اسەرى بولمايدى. ويتكەنى جەمىس- جيدەكتەر مەن كوكونىستەردى ەكسپورتتايتىن وزگە دە ەلدەر از ەمەس.

مىسالى، سيترۋستى جەمىستەر مەن شابدالى بويىنشا ىشكى قاجەتتىلىكتى وزبەكستان، تاجىكستان، تۇرىكمەنستان، پاكىستان جانە تاعى باسقا ەلدەردىڭ ەسەبىنەن جەتكىزۋ ارقىلى جابۋعا بولادى.