قاسىم- جومارت توقايەۆ قىتاي كومپارتياسى و ك ساياسي بيۋروسىنىڭ مۇشەسى ياڭ جيەچيمەن كەزدەستى
ياڭ جيەچي قاسىم- جومارت توقايەۆقا ق ح ر باسشىلىعىنىڭ كوروناۆيرۋس ىندەتىنىڭ تارالۋىنا قارسى كۇرەس جونىندە قابىلداعان شارالارى تۋرالى باياندادى.
مەملەكەت باسشىسى قىتايدىڭ ىندەتتى اۋىزدىقتاۋ ءۇشىن اتقارىپ جاتقان جۇمىستارىن جوعارى باعالاپ، قازاقستاننىڭ وسى جاھاندىق دەڭگەيدەگى قاۋىپكە قارسى بىرلەسىپ كۇرەسۋگە نيەتتى ەكەنىن ايتتى.
- وسىنداي قيىن ساتتە قازاقستان رەسپۋبليكاسى قىتاي حالىق رەسپۋبليكاسى باسشىلىعىنىڭ ناقتى ءارى تاباندى ءىس- ارەكەتتەرىنە جان- جاقتى قولداۋ بىلدىرەدى. ءتوراعا شي جينپيننىڭ ءوزى ايتقانداي، بۇل قىتاي حالقىنىڭ سوڭعى جىلدارى باستان كەشىپ وتىرعان ەڭ قيىن كەزەڭى. ءومىردىڭ ءارتۇرلى كەزەڭدەرىندە كەزدەسەتىن وسىنداي اۋىرتپالىقتارمەن بىرلەسىپ كۇرەسەمىز دەپ ويلايمىن. ەكى مەملەكەت اراسىنداعى ستراتەگيالىق سەرىكتەستىكتى دامىتۋ جانە نىعايتۋ جولىندا العا قادام باسا بەرەمىز، - دەدى مەملەكەت باسشىسى.
كەزدەسۋ بارىسىندا قازاق- قىتاي بايلانىستارىن نىعايتۋدىڭ پەرسپەكتيۆالارى، سونداي- اق، ەكى ەلدىڭ حالىقارالىق ارەناداعى ىقپالداستىعى تالقىلاندى.
- ق ح ر ءتوراعاسى شي جينپيننىڭ سالەمىن جەتكىزۋگە رۇقسات ەتىڭىز. ءسىز بىلتىر قىركۇيەك ايىندا قىتايعا العاش رەت مەملەكەتتىك ساپارمەن باردىڭىز. سول كەزدە ق ح ر توراعاسىمەن بىرلەسىپ جان- جاقتى ستراتەگيالىق سەرىكتەستىكتى ودان ءارى دامىتۋ تۋرالى مالىمدەمە جاساپ، قىتاي- قازاق قاتىناستارىنا تىڭ سەرپىن بەردىڭىزدەر، - دەدى ياڭ جيەچي.
