عالىمدار قاتەرلى ىسىكتى يىسىنەن انىقتايتىن جۇمىر قۇرتتاردى ءوسىرىپ شىعارماقشى

نۇر-سۇلتان. قازاقپارات – عالىمدار قاتەرلى ىسىكتى يىسىنەن انىقتايتىن جۇمىر قۇرتتاردى ءوسىرىپ شىعارماقشى. راكتى انىقتاۋدىڭ مۇنداي ءتاسىلىن تابۋعا عالىمدارعا ءيتتىڭ قابىلەتى كومەكتەسكەن.

عالىمدار «جامان اۋرۋدىڭ» 15 ءتۇرىن يىسكەپ تاباتىن جۇمىر قۇرتتار وسىرمەك. مۇنداي بىرەگەي ءادىستى جاپون عالىمدارى ويلاپ تاپقان، دەپ حابارلايدى ك ت ك.

Hirotsu Bio Science Inc كومپانياسىنىڭ ديرەكتورى حيروتسۋ تاكااكيدىڭ ايتۋىنشا، عىلىمدا نەماتود نەمەسە قاراپايىم تىلدە جۇمىر قۇرت اتانىپ جۇرگەن قۇرت تۇقىمىنىڭ ەرەكشە قابىلەتى بار.

«نەماتود قۇرتتارىنىڭ ەرەكشەلىگى - ءيىستى تەز سەزەدى ءارى ۇناعان يىسىنە قاراي جىلجىپ، ۇناماعان يىسىنەن قاشادى. سول قاسيەتىنە سۇيەنىپ ادامنىڭ دارەتتەرىن قويىپ، جانىنا قۇرتتاردى جىبەرەمىز. ەگەر قۇرت دارەتكە جاقىنداسا، وندا وبىر جوق دەگەن ءسوز. ال جاقىنداماي قويسا، وندا ءبىر كىنارات بار دەگەن ءسوز»، - دەيدى عالىم.

بۇل تاسىلمەن راكتىڭ 15 ءتۇرىن ەرتە انىقتاۋعا بولادى ەكەن: اسقازان راگى، توق ىشەك راگى، وكپە راگى، كەۋدە راگى، ومىراۋ راگى، ۇيقى بەزى راگى، باۋىر راگى، قۋىقاستى بەزى، وڭەش راگى، انالىق بەز راگى، ءوت قابى مەن ءوت جولى، نەسەپ جولى، بۇيرەك، اۋىزاستى راگى، تاماق راگى.

راكتى انىقتاۋدىڭ مۇنداي ءتاسىلىن تابۋعا عالىمدارعا ءيتتىڭ قابىلەتى كومەكتەسكەن. ويتكەنى يت تە ءيىستى تەز سەزەدى ءارى ۇيرەتۋگە، باپتاۋعا كەلگەندە الدىنا جان سالمايدى. بۇعان دەيىن جاپون عالىمدارى راكتى انىقتاۋ ءۇشىن يتتەردى پايدالانعان ەدى. ال پوشىمى كىشكەنتاي، ۇزىندىعى 1 ميلليمەترگە ارەڭ جەتەتىن جۇمىر قۇرتتىڭ ارتىقشىلىعى - يتكە قاراعاندا ءيىستى 1,5 ەسە تەز سەزەدى. قۇرىلعى انىقتاي المايتىن ءيىستى سەزە الادى. ال بۇل راكتى ەرتە كەزدە انىقتاۋعا مۇمكىندىك بەرەدى.