مەكسيكالىق تىڭدارماندار ديماشتى ءوز ەلىنە شاقىردى

نۇر-سۇلتان. قازاقپارات - ديماش قۇدايبەرگەننىڭ مەكسيكالىق تىڭدارماندارى ونى ءوز ەلىنە شاقىردى، دەپ حابارلايدى قازاقپارات.

بۇل جونىندە ديماشتىڭ اكەسى ءارى پروديۋسەرى قانات ايتبايەۆ Instagram پاراقشاسىندا جاريالادى.

«مەكسيكالىق تىڭدارماندار ديماشقا سالەم جولداپ، ەلىنە شاقىرۋدا. ىقىلاستارىڭىز ءۇشىن كوپ راحمەت، dears!» ، - دەپ جازدى قانات ايتبايەۆ.

مەكسيكالىق جانكۇيەرلەر سۇيىكتى انشىسىنە ارناعان ۆيدەوسىن ەرەكشە ەتىپ تۇسىرگەن. ولار قالاداعى ەڭ ادەمى ورىندى تاڭداپ، ديماشتىڭ سۋرەتى بەينەلەنگەن ارنايى پلاكاتتار، باننەرلەر دايىنداعان. ءسويتىپ قولىنا قازاقستاننىڭ تۋىن ۇستاپ، ءانشىنى مەكسيكاعا كەلىپ، كونسەرت وتكىزۋگە انمەن شاقىرادى.

«لاتىن امەريكاسىنداعى تىڭدارماندارىم ماعان جىپ-جىلى ۆيدەو جولداپتى. مەنى قالاي قولدايتىندارىڭىزدى بىلەم. جاقىن ارادا قاۋىشامىز دەگەن ۇمىتتەمىن. شاقىرعاندارىڭىز ءۇشىن كوپ راحمەت. وتە ريزا بولدىم»، - دەپ ريزاشىلىعىن ءبىلدىردى ديماش Instagram پاراقشاسىندا.