قاسىم- جومارت توقايەۆ: قازاقستاندا تۇراتىن بارلىق ەتنوس شىن مانىندە ءبىر ۇلت سانالادى

نۇر- سۇلتان. قازاقپارات - قازاقستاندا تۇرىپ جاتقان بارلىق ۇلتتار، ەتنيكالىق توپتار شىندىعىنا كەلگەندە ءبىر ۇلت سانالادى.

بۇل جايىندا قازاقستان پرەزيدەنتى قاسىم- جومارت توقايەۆ informburo.kz اقپاراتتىق- ساراپتامالىق پورتالىنا بەرگەن ەكسكليۋزيۆتى سۇحباتىندا ايتتى، دەپ حابارلايدى قازاقپارات ءتىلشىسى.

«ەرتەڭ، 1 - ناۋرىزدا جامبىل وبلىسىنا جۇمىس ساپارىمەن بارامىن. قورداي اۋدانىنىڭ قازاقتار مەن دۇنگەندەر تۇراتىن اۋىلدارىنىڭ تۇرعىندارىمەن كەزدەسۋدى جوسپارلاپ وتىرمىن. ءبىز ۇلتارالىق، ەتنوسارالىق قارىم- قاتىناس ماسەلەسىندەگى امالدارىمىزدى قايتا وي ەلەگىنەن وتكىزۋگە ءتيىستى ەكەندىگىمىز ءسوزسىز. قازاقستان دوستىق پەن كەلىسىم اۋماعى بولدى جانە بولىپ تا قالا بەرەدى. ءبىزدىڭ ۇرانىمىز: سان الۋاندىقتاعى بىرلىك. وسى جەردە تۇرىپ جاتقان بارلىق ۇلتتار، ەتنيكالىق توپتار شىندىعىنا كەلگەندە ءبىر ۇلت سانالادى. شەتەلدى ءبىزدى «قازاقتار« دەپ بىلەدى. ويتكەنى، ءبىزدىڭ مەملەكەتىمىزدىڭ اتاۋى ءدال وسى سوزدەن استاسىپ جاتىر» ، - دەدى ق ر پرەزيدەنتى. مەملەكەت باسشىسى قازاقستاندا تۇراقتى تۇراتىن ءاربىر ەتنوستىڭ وزىندىك ەرەكشەلىگىنە نۇقسان كەلتىرمەۋى تيىستىگىن باسا ايتتى. «ولاردىڭ بارلىعى وزدەرىنىڭ تىلدەرىن وقىپ، قولدانۋعا، مادەنيەتتەرىن دامىتىپ، ادەت- عۇرىپتارىن ساقتاۋعا قۇقىلارى بار جانە بولىپ تا قالا بەرەدى. بۇعان قوسا، قازاق ءتىلى دە جەدەل دامۋى ءتيىس. ول بولاشاقتا شىن مانىندە ۇلتارالىق بايلانىس تىلىنە اينالۋى ءتيىس. بىزگە الەمدىك عىلىم مەن مادەنيەت بىلىمىنە جول اشقان ورىس ءتىلىنىڭ تاريحي ءمانىن تومەندەتىپ وتىرعانىم جوق. قازاقستان تۇرعىندارى ونى جوعارى دەڭگەيدە ءبىلۋى ءتيىس. مۇنىڭ بىزگە تەك پايداسى بار» ، - دەدى قاسىم- جومارت توقايەۆ.