ءتورت جىلدا ءبىر ارتىق كۇن كەلەتىن - كىبىسە جىل
ارتىق ءبىر كۇننىڭ اقپان ايىنىڭ 29 نا كەلەتىنى بەلگىلى. ەندەشە بۇگىن كىبىسە كۇن! ءبىرقاتار دەرەكتەرگە سۇيەنسەك، كىبىسە جىلى ەجەلگى مىسىردا پايدا بولعان دەسەدى. مىسىردىڭ ەسەپشى- عالىمدارى (جۇلدىزشىلارى) ءار جىلداردى زەرتتەي وتىرىپ، ءار جىلدىڭ 365 كۇننەن تۇراتىنىن ساناعان ەكەن. قازىرگى قولدانىستاعى كۇنتىزبە دە سونداي ساناقتىڭ ناتيجەسى. سول ساناق بويىنشا عالىمدار كۇن مەن ءتۇننىڭ تەڭەلۋ ۋاقىتىنىڭ اراسىن جىل دەپ اتاعان. جىلدى ءتورت مەزگىلگە جىكتەپ، ءار ءۇش جىلدىڭ 365 كۇنگە اياقتالاتىنىن، وسى ءۇش جىلدان سوڭ ءبىر كۇننىڭ ارتىق شىعاتىنىن ەسەپتەپ، ءتورتىنشى جىلدى 366 كۇنگە تولاتىنىن شىعارعان. «كىبىسە جىل» (ۆيسوكوس) وسىدان شىعىپ وتىر. ەجەلگى جۇلدىزشىلاردىڭ بۇنداي ەسەپتەۋلەرى عىلىمي تۇجىرىمدارمەن دە سايكەسكەن، ياعني ءتورت جىلدا ءبىر رەت تاۋلىك سانىنىڭ ارتىق بولاتىنىن عالىمدار دا مويىنداعان. حالىق اراسىندا كىبىسە جىلىنا قاتىستى الۋان پىكىر، ءتۇرلى نانىم- سەنىم مەن ىرىمدار بار. ءتىپتى كەيبىرەۋلەر وسى جىلدىڭ قيىن- قىستاۋعا تولى بولاتىنىن ساۋەگەيلەيدى. الايدا وتكەن كەزەڭدەر كىبىسە جىلىنىڭ قازاق ەلىنە جايسىز ەمەس ەكەنىن، كەرىسىنشە ەرەكشە ورىن الىپ جاتاتىنىن بايقاۋعا بولادى.