دۇنيەجۇزىلىك دەنساۋلىق ساقتاۋ ۇيىمى كوروناۆيرۋس قاۋپى ەڭ جوعارى دەڭگەيدە دەپ جاريالادى

جەنەۆا. قازاقپارات - Twitter ارقىلى ترانسلياتسيا جاسالعان باسپا ءسوز ءماسليحاتىندا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحان گەبرەيەسۋس ددۇ Covid-2019 قاۋپىنىڭ باعالانۋىن بارىنشا جوعارى دەڭگەيگە دەيىن كوتەرگەنىن ءمالىم ەتتى، دەپ حابارلايدى قازاقپارات.

الايدا د د ۇ وكىلدەرىنىڭ مالىمەتىنشە، جاھاندىق دەڭگەيدە كوروناۆيرۋس ءالى پاندەميا ەمەس، ازىرگە بۇل ءارتۇرلى ەلدەردەگى ىندەت قانا. د د ۇ ەۋروپالىق ايماقتىق بيۋروسى Covid-2019 كوروناۆيرۋسىڭ تارالۋ جاعدايى بويىنشا (28 - اقپان 22:30 داعى جاعداي بويىنشا) اقپارات تاراتتى. سوڭعى تاۋلىكتە تاعى ءۇش ەلدە (بەلارۋس، ليتۆا جانە نيدەرلاند) ۆيرۋس جۇقتىرۋدىڭ العاشقى جاعدايلارى انىقتالعانى تۋرالى حابارلاندى. ەۋروپادا اۋرۋ جۇقتىرۋ جاعدايلارىنىڭ راستالعان سانى - 1123, ودان كوز جۇمعاندار - 23. جالپى العاندا، قىتايدان تىس جەرلەردە كوروناۆيرۋس جۇقتىرعاندار سانى 49 ەلدە 4351 گە جەتتى، 67 ادام قايتىس بولدى.