قىتاي كوروناۆيرۋستىڭ تارالۋىن توقتاتۋ ءۇشىن روبوت پەن درونعا كوشتى

نۇر-سۇلتان. قازاقپارات - قىتايدا جانارماي قۇيۋ بەكەتتەرى جۇرگىزۋشىلەردىڭ كوروناۆيرۋسقا شالدىعۋىن بولدىرماۋ ءۇشىن ءتۇرلى ادىستەر قولدانىپ جاتىر.

مىسالى، «سينوپەك» كومپانياسى ءوز ستانتسيالارىندا ازىق- تۇلىك تاسۋشى جۇرگىزۋشىلەرمەن تىكەلەي بايلانىستى شەكتەي باستاعان. ياعني جۇرگىزۋشىلەر تاپسىرىستى الۋ ءۇشىن كولىكتەن سىرتقا شىقپايدى. تاعام ءتۇرلى جەتكىزۋ قىزمەتتەرى ارقىلى قاپتالىپ، كولىككە سالىنادى. جۇرگىزۋشىلەر مۇنداي قىزمەتتىڭ قاۋىپسىز ءارى ءتيىمدى ەكەنىن ايتادى.

فۋ يۋي، جۇرگىزۋشى:

- بۇل قاۋىپسىز ءارى ىڭعايلى. سەبەبى ىندەتتىڭ تارالۋى باسىلعان جوق. مۇنداي قىزمەت بىزگە قوعامدىق ورىنداردا كوپ ۋاقىت بولماۋعا مۇمكىندىك بەردى. قازىر ادامدار ۇيلەرىنەن سيرەك شىعاتىن بولعان. ال مىناداي قىزمەتتىڭ تيىمدىلىگى زور.

جالپى قىتايدا كوروناۆيرۋس جەرگىلىكتى نارىققا ۇلكەن وزگەرىستەر اكەلدى. ۆيرۋستىڭ تارالۋىنا توسقاۋىل قويۋ ءۇشىن قىزمەت كورسەتۋ ونلاين رەجيمگە كوشكەن. ءتىپتى ادامداردىڭ قاۋىپتى دەرتكە شالدىقپاۋى ماقساتىندا روبوتتار مەن درونداردى قولدانۋ كوبەيگەن.

www.24.kz