قىتايلىق دارىگەرلەر كوروناۆيرۋستان كوز جۇمعان ناۋقاستىڭ دەنەسىن سويىپ، ناتيجەسىن جاريا ەتتى

نۇر-سۇلتان. قازاقپارات - قىتايلىق دارىگەرلەر كوروناۆيرۋستان كوز جۇمعان ناۋقاستىڭ دەنەسىن سويىپ، سوعان قاتىستى جاسالعان ەسەپتى جاريا ەتكەن.

اۋپوپسيا ناتيجەلەرى Journal of Forensic Medicine جۋرنالىندا جاريالانعان ەكەن. بۇل تۋرالى ريا نوۆوستي حابارايدى.

پاتولوگيالىق زەرتتەۋ كورسەتكەندەي، COVID-19 ۆيرۋسى ەڭ الدىمەن ادامنىڭ وكپەسىنە اسەر ەتەدى. ۆيرۋستىڭ باسقا مۇشەلەرگە اسەر ەتەتىندىگى ءالى دالەلدەنبەگەن.

دەنەسىن ساراپشىلار تەكسەرگەن ناۋقاس 1 - قاڭتاردا اۋرۋحاناعا بىرنەشە باس مي ينفاركتىمەن ءتۇستى. بۇل ۋحان قالاسىنىڭ 85 جاستاعى تۇرعىنى ەدى.

اۋرۋحاناعا جەتكىزىلگەندە ناۋقاستىڭ قىزۋ، جوتەل جانە باسقا دا ۆيرۋس بەلگىلەرى بايقالماعان. اۋرۋحاناعا تۇسكەننەن كەيىنگى 10- كۇنى ناۋقاستىڭ تاماعىندا قىشۋ پايدا بولىپ قىزۋى كوتەرىلگەن. كومپيۋتەرلىك توموگرافيادان ونىڭ ەكى وكپەسىندە ينفەكسيا بار ەكەنى كورىندى.

اۋرۋحاناعا جاتقىزىلعاننان كەيىنگى 13- كۇنى ناۋقاستىڭ كوروناۆيرۋستىق نۋكلەين قىشقىلىنىڭ جاڭا تۇرىنە جۇرگىزىلگەن ءاناليزى وڭ ناتيجە بەرىپ، ناۋقاسقا COVID-19 دياگنوزى قويىلدى.

20-كۇنى وكپەگە جاسالعان توموگرافيادا ينفەكتسيا ودان ءارى تارالىپ جاتقانى كورىنگەن. 28- كۇنى ناۋقاس كوز جۇمىپ، وعان «كوروناۆيرۋستىڭ جاڭا تۇرىنەن تۋىنداعان پنيەۆمونيا، تىنىس الۋ جەتكىلىكسىزدىگى» دەگەن دياگنوز قويىلعان.

اۋتوپسيا ۋحان اۋرۋحاناسىندا ناۋقاس كوز جۇمعانان كەيىن 12 ساعاتتان سوڭ جۇرگىزىلدى.

«زەرتتەۋ ناتيجەلەرى كورسەتكەندەي، بۇل تىنىس الۋ جولدارىنىڭ جانە وكپە الۆەولالارىنىڭ تەرەڭ بولىكتەرىنىڭ زاقىمدانۋى، بۇل كوروناۆيرۋستىڭ جاڭا تۇرىنەن تۋىنداعان پنيەۆمونيا. مارقۇمنان ەرتەرەك الىنعان اناليزدە COVID-2019 پاتولوگيالىق پروتسەسى SARS- كە ( SARS - بۇل ءجىتى رەسپيراتورلىق سيندروم) جانە MERS- پەن (تاياۋ شىعىس تىنىس الۋ سيندرومى) وتە ۇقساس ەكەنىن كورسەتتى، الايدا COVID-2019 دا وكپە فيبروزى SARS- قا قاراعاندا اۋىر ەمەس « ، - دەلىنگەن حابارلامادا.

ۆيرۋس باسقا ىشكى مۇشەلەرگە، مىسالى بۇيرەككە، باۋىرعا اسەر ەتە مە، جوق پا، ساراپشىلار ايتا الماي جاتقان كورىنەدى. مۇنىڭ سەبەبى كوز جۇمعان ەر ادام ەگدە تارتقان جانە ونىڭ باسقا دا ورگاندارى اۋىرعان سوندىقتان بۇل ماسەلەنى ناقتىلاۋ ءۇشىن قوسىمشا زەرتتەۋ قاجەت.

اۋتوپسيانى تۋنتسزي ليۋ ليان، ۋنيۆەرسيتەتتىڭ سوت مەديتسيناسى كافەدراسىنىڭ پروفەسسورى، 30 جىلدىق تاجىريبەسى بار پاتولوگ- دارىگەر باسقاردى.

مامانداردىڭ پىكىرىنشە، جاڭا كوروناۆيرۋس پاتولوگياسىن زەرتتەۋ اۋرۋدىڭ مەحانيزمدەرىن، ونىڭ پاتوگەنەزى مەن قاۋىپتىلىگى ءۇشىن، سونىمەن قاتار باسقا ناۋقاستاردى ەمدەۋ ءۇشىن وتە ماڭىزدى.

«ءبىز «دۇشپاننىڭ» قاي جەردە ەكەنىن، ونىڭ «قارۋى» نە ەكەنىن، كۇشىن بىلمەيمىز. پاتولوگيالىق اناتوميا مەن كەيىنگى زەرتتەۋلەردىڭ ارقاسىندا ۆيرۋستىڭ ادام اعزاسىنا تارالۋىن ميكروسكوپتىڭ كومەگىمەن بايقاۋعا بولادى. قانداي مۇشەلەر، ۇلپالار مەن جاسۋشالار ەڭ كوپ زارداپ شەككەنىن، «جاۋدىڭ» السىزدىگى نە ەكەنىن تۇسىنۋگە بولادى. كومپيۋتەرلىك توموگرافياسى ناۋقاستىڭ وكپەسىندە وزگەرىس بەلگىلەرىنىڭ پايدا بولۋىن كورسەتتى « ، - دەيدى دارىگەر ليۋ ليان.