قازاقستان مۇسىلماندارى ءدىني باسقارماسى كوروناۆيرۋسىنە قاتىستى مالىمدەمە جاسادى

None
None
نۇر- سۇلتان. قازاقپارات - قازاقستان مۇسىلماندارى ءدىني باسقارماسى Covid-19 كوروناۆيرۋسىنە قاتىستى مالىمدەمە جاسادى، دەپ حابارلايدى قازاقپارات.

مالىمدەمە قازاقستان مۇسىلماندارى ءدىني باسقارماسىنىڭ رەسمي سايتىندا جاريالاندى. «بۇگىندە بۇكىل الەم حالقىنا كوروناۆيرۋس قاۋپى ۇرەي سەۋىپ، دەرتتىڭ وزىنەن گورى كۇننەن- كۇنگە ورشەلەنە تۇسكەن داقپىرتى مەن دابىلى دۇنيەجۇزىن دۇرلىكتىرۋدە. جاڭالىقتان دا ەستيتىنىمىز، جان- جاقتاعى جۇرتتىڭ كوبى شەكاراسىن قىمتاپ، قاۋىپتىڭ بەتىن العان ءبىرقاتار ساقتىق شارالارى جۇزەگە اسىرىلعان. اللاعا شۇكىر، اتالمىش دەرتتىڭ ءبىزدىڭ ەلىمىزدە بەلگىسى دە جوق، شەتتەن كەلگەن ازاماتتارىمىز ءدىن امان. الايدا، «ساقتانساڭ - ساقتايمىن» دەمەكشى، تورتكۇل الەمگە تۇگەل قاۋىپ توندىرگەن دەرتكە نەمقۇرايلىق تانىتىپ، نەمكەتتى قاراۋ - ءوزىمىز ءۇشىن عانا ەمەس، جانىمىزداعى جانداردىڭ ومىرىنە دە اسەرىن تيگىزەرى بەك مۇمكىن. وسى ورايدا، قازاقستان مۇسىلماندارى ءدىني باسقارماسى ەلىمىزدىڭ ءاربىر ازاماتىن قوعامدىق ورىنداردا تازالىق ەرەجەلەرىن ساقتاپ، ءوز دەنساۋلىقتارىنا اسقان مۇقياتتىلىقپەن ءمان بەرىپ، ساقتانىپ جۇرۋگە شاقىرادى.

اللا تاعالا قاسيەتتى قۇراندا ادامزات بالاسىنا: «وزدەرىڭدى ءوز قولدارىڭمەن قاۋىپ- قاتەرگە سالماڭدار» ، - دەپ ەسكەرتۋ جاساعان. اللا بەرگەن امانات - ءوز ءومىرىمىز بەن دەنساۋلىعىمىزعا دۇرىس كۇتىم جاساماي، قاۋىپ- قاتەرگە كوزسىز ۇرىنار بولساق، تۇبىندە وپىق جەيتىنىمىز ءسوزسىز. بۇل تۋرالى اللا ەلشىسى (وعان اللانىڭ سالاۋاتى مەن سالەمى بولسىن) ءوزىنىڭ ءبىر وسيەتىندە: «كىمدە- كىم ەسىنەسە قولىمەن اۋزىن جاپسىن، ويتكەنى زياندى نارسەلەر اۋزىنا كىرەدى» ، - دەپ بۇيىرعان. سونداي- اق، شاريعاتتا جۇقپالى اۋرۋلاردىڭ جاي كوزگە كورىنبەيتىن زياندى كۇشى بارىن، بىلىنبەي تارايتىنىن جانە اۋرۋدىڭ ەتەك الۋىن توقتاتۋدا كارانتين قاجەت ەكەنى اتاپ ايتىلعان. ويتكەنى، پايعامبارىمىز (وعان اللانىڭ سالاۋاتى مەن سالەمى بولسىن) ادام بالاسىنىڭ وزىنە دە، وزگەگە دە زيان كەلتۋرۋىنە قاتاڭ تۇردە تىيىم سالعان. قۇرمەتتى، وتانداستار! سىزدە جوتەل پايدا بولىپ، بويىڭىزدا دەنە قىزۋىنىڭ جوعارىلاۋى بايقالسا نەمەسە تىنىس الۋ قيىنعا سوققان جاعدايدا، دەر كەزىندە دارىگەرگە جۇگىنۋگە، سونداي- اق قوعامدىق ورىندارعا، ءتىپتى مەشىتكە كەلۋدى توقتاتىپ، قۇلشىلىقتارىڭىزدى ۇيلەرىڭىزدە ورىنداۋعا كەڭەس بەرەمىز! اللا تاعالا ەلىمىزدى، حالقىمىزدى ءتۇرلى پالەدەن، اۋرۋدان، ءتىل- كوزدەن ساقتاعاي! ءامين!» ، - دەلىنگەن مالىمدەمەدە. ايتا كەتەيىك، وسىعان دەيىن مەملەكەت باسشىسى قاسىم- جومارت توقايەۆ ۇكىمەتكە كوروناۆيرۋسقا قارسى جان- جاقتى شارا قابىلداۋدى تاپسىرعان بولاتىن.

سوڭعى جاڭالىقتار