ادەپتى بالا ازبايدى

نۇر-سۇلتان. قازاقپارات - بالانىڭ تاربيەلى بولعانى كىمگە جامان؟ اتا- انا بولعان سوڭ، ءبارى بالاسىمەن ماقتانعىسى كەلەدى. ال بالاڭمەن ماقتانعىڭىز كەلسە، وعان جاقسى تاربيە بەرە ءبىلۋىڭىز كەرەك.

اسىرەسە، ادەپتى بالا سۇيكىمدى كەلەدى. وزگەلەردەن ۇيالماس ءۇشىن بۇلدىرشىنگە ادەپتى بولۋدى ۇيرەتىڭىز. سوعان وراي، بالاعا كەلەسىدەي ادەپتەردى ۇيرەتۋ كەرەكتىگىن كەڭەس ەتەمىز.

1. كەشىرىم سۇراۋ. وعاش نە وقىس نارسە جاساپ قويعاندا، بالاعا كەشىرىم سۇراۋدى ۇيرەتىڭىز. كەشىرىم سۇراۋ بالانىڭ كىشىپەيىلدىگىن ارتتىرادى. ءارى باسقا ادامداردىڭ كوزىنشە بەيادەپكە بارسا، بالادان كەشىرىم سۇراتۋ ارقىلى كىنانى جۋىپ- شايۋعا بولادى.

2. العىس ايتۋ. راحمەت ايتقان بالانىڭ ءتىلى قانداي ءتاتتى! العىس ايتقان بالا ەڭبەكتى، مەيىرىم مەن كومەكتى باعالاۋدى ۇيرەنەدى. ءارى ادامدارعا قۇرمەت كورسەتىپ، سىيلاۋ قاجەتتىگىن تۇسىنەدى. قاعىلەز بولىپ وسەدى.

3. ءسوزدى بولمەۋ. سويلەپ تۇرعان ادامنىڭ ءسوزىن بولمەۋ، ونى سوڭىنا دەيىن تىڭداۋ - ۇلكەن مادەنيەت. مۇنداي ادەپتى بالاعا ۇيرەتسەڭىز، بەيادەپ، وجار بولمايدى. ال بالاعا ءسوزدى بولمەۋدى ۇيرەتكىڭىز كەلسە، الدىمەن، ءسىز بالانىڭ ءسوزىن بولمەۋدى ادەتكە اينالدىرىڭىز.

4. رۇقسات سۇراۋ. بالا تابيعاتىنان تىنىمسىز، ءبىلىمپاز، مازاسىز كەلەتىنى بەلگىلى. ايتەۋىر ءبىر نارسەگە ۇرىنادى دا جۇرەدى. ال بالانى بولماس نارسەگە ۇرىندىرماس ءۇشىن وعان رۇقسات سۇراۋدى ۇيرەتىڭىز. رۇقسات سۇراعان بالا قانداي ارەكەتكە بارىپ، ال قانداي ارەكەتكە بارماۋ كەرەكتىگىن تۇسىنە باستايدى.

5. امانداسۋ. امانداسۋ ارتىق ەمەس. كىشكەنتايىڭىزعا بالا كەزىنەن باستاپ امانداسۋدى ۇيرەتىڭىز. تانىمايتىن ادام كەلسە، اماندىعىن ءبىلسىن. سوندا بالا ادامدارمەن بايلانىس ورناتۋدى، قالاي سويلەسۋ كەرەكتىگىن ۇعىنا باستايدى.

6. ۇلكەندەردى قۇرمەتتەۋ. ۇلكەن كىسىلەردى قۇرمەتتەپ، ولارعا ورىن، جول بەرۋدى ۇيرەتىڭىز. ول ءۇشىن ءوزىڭىز دە ۇلكەندەردى سىيلاۋ الۋىڭىز كەرەك. بالاڭىز سىزگە قاراپ ونەگە الاتىنى ءسوزسىز. قاراپايىم عانا، اۆتوبۋسقا وتىرعاننىڭ وزىندە ۇلكەن كىسىگە ورىن بەرىڭىز.

Massaget.kz