سىرتقى ىستەر مينيسترلىگى ساۋد ارابياسىنىڭ ۆيزانى توقتاتۋىنا بايلانىستى تۇسىنىك بەردى
ق ر سىرتقى ىستەر مينيسترلىگى تاياۋ، ورتا شىعىس جانە افريكا دەپارتامەنتىنىڭ ديرەكتورى ەرجان مۇقاش ساۋد ارابياسى كورولدىگىنىڭ قازاقستانداعى ەلشىسى ابدۋلازيز بەن ابدۋللا ءال- داۋدپەن كەزدەستى.
كەزدەسۋ بارىسىندا ەكىجاقتى ىنتىماقتاستىقتىڭ وزەكتى ماسەلەلەرى، ونىڭ ىشىندە قازاقستان مەن ساۋد ارابياسى اراسىنداعى ساۋدا- ەكونوميكالىق جانە مادەني- گۋمانيتارلىق بايلانىستاردى دامىتۋ ماسەلەلەرى تالقىلاندى.
ەلشى ساۋد ارابياسى بيلىگىنىڭ ءبىرقاتار ەلدەردىڭ ازاماتتارى ءۇشىن ەلەكتروندىق تۋريستىك ۆيزالاردى بەرۋدى ۋاقىتشا توقتاتۋ جونىندەگى تاياۋداعى شەشىمى تۋرالى ماسەلەگە تۇسىنىكتەمە بەردى.
«ا. ءال- داۋد ۋمرا جاساۋ ءۇشىن قاجىلىق ۆيزالاردى، سونداي- اق تۋريستىك ۆيزالاردى بەرۋ بۇكىل الەم بويىنشا كوروناۆيرۋس ىندەتىنىڭ كەڭ تارالۋىنا بايلانىستى توقتاتىلعانىن راستاعان. بۇل شارا ۋاقىتشا جانە كورولدىككە كەلەتىن الەمنىڭ بارلىق مۇسىلماندارىن قورعاۋعا باعىتتالعان. سونىمەن قاتار، ول ۆيزانىڭ ىسكەرلىك جانە باسقا دا تۇرلەرىن بەرۋ توقتاماعانىن جەتكىزدى» ، - دەلىنگەن حابارلامادا.
ساۋد ەلشىسىنىڭ ايتۋىنشا، ازاماتتارعا كىرۋ توقتاتىلعان مەملەكەتتەردىڭ ءتىزىمى الەمدە كوروناۆيرۋستىڭ تارالۋى بويىنشا جاعدايدىڭ وزگەرۋىنە بايلانىستى جاڭارتىلىپ تۇرادى. سونىمەن قاتار، بۇل تىزىمگە قازاقستانمەن قاتار ورتالىق ازيانىڭ باسقا دا ەلدەرى ەنگىزىلگەن.
كەزدەسۋ قورىتىندىسى بويىنشا تاراپتار كوروناۆيرۋستىڭ تارالۋىنا بايلانىستى ءوز ەلدەرىندەگى ەپيدەميولوگيالىق جاعداي بويىنشا وزەكتى اقپاراتپەن الماسۋعا ۋاعدالاستى.