جانسەيىت تۇيمەبايەۆ قورداي اۋدانىنداعى پروبلەمالاردى جاريالادى

نۇر- سۇلتان. قازاقپارات - قازاقستان حالقى اسسامبلەياسى ءتوراعاسىنىڭ ورىنباسارى، ق ح ا حاتشىلىعىنىڭ مەڭگەرۋشىسى جانسەيىت تۇيمەبايەۆ جامبىل وبلىسىنىڭ قورداي اۋدانىنداعى پروبلەمالاردى اتادى، دەپ حابارلايدى قازاقپارات ءتىلشىسى.

«بۇگىنگى تاڭدا قورداي وقيعالارى مەملەكەتتىك ورگانداردىڭ، ق ح ا، ساراپشىلار مەن جۇرتشىلىقتىڭ نازارىندا تۇر. كورداي وقيعالارىن ءتۇسىندىرۋ ءۇشىن «ەگەمەن قازاقستان» ، «كازاحستانسكايا پراۆدا» گازەتتەرىنە ماقالالار دايىندادىق. ودان بولەك، كۇن تارتىبىندە ۇلتارالىق قاتىناستار سالاسىنداعى مەملەكەتتىك ساياساتتى رەفورمالاۋ ماسەلەسى كوتەرىلدى»، - دەدى جانسەيىت تۇيمەبايەۆ ەلوردادا ەتنوساياساتتىڭ وزەكتى ماسەلەلەرى تۋرالى دوڭگەلەك ۇستەل وتىرىسىندا.

ونىڭ ايتۋىنشا، 11-14 - اقپان كۇندەرى قحا عىلىمي- ساراپتامالىق كەڭەسىنىڭ ساراپشىلار توبى قورداي اۋدانىنا بارىپ قايتتى.

«2016 -جىلى جۇرگىزىلگەن بۇرىنعى زەرتتەۋلەر ءبىرقاتار پروبلەمالاردى انىقتادى. بيىلعى ساپار سول ماسەلەلەردىڭ ءالى بار ەكەنىن كورسەتتى. ولاردىڭ قاتارىنا الەۋمەتتىك- مادەني وقشاۋلانۋ، دۇنگەن تۇرعىندارىنىڭ تۇيىقتالۋى، جاستاردىڭ جالپىقازاقستاندىق الەۋمەتتەنۋ باعدارلاماسىنان تىس قالۋى، مەملەكەتتىك قىزمەتشىلەر اراسىنداعى ەتنيكالىق تەڭسىزدىك ماسەلەلەرى بار. ەتنيكالىق بەلگىلەرى بويىنشا بەلگىلى ءبىر الەۋمەتتىك- ەكونوميكالىق جىكتەلۋ، جەر مەن سۋ رەسۋرستارىنىڭ تاپشىلىعى، كونتراباندا، قۇقىق قورعاۋ ورگاندارىنداعى جەمقورلىق بار. دۇنگەن حالقىنىڭ ەداۋىر بولىگى قىرعىزستان مەن قىتايداعى وقۋ ورىندارىن قۇپ كورەدى، قىرعىز ۇيالى بايلانىس وپەراتورلارى مەن ورىس، قىرعىز جانە قىتاي تەلەارنالارىن كورسەتەتىن جەرسەرىكتىك سپۋتنيكتى پايدالانادى»، - دەپ اتاپ ءوتتى ج. تۇيمەبايەۆ.

ق ح ا وكىلىنىڭ ايتۋىنشا، ءبىلىم بەرۋ، دەنساۋلىق ساقتاۋ، الەۋمەت، جەر پايدالانۋ جانە ەڭبەك قاتىناستارى سالاسىنداعى شەشىلمەگەن پروبلەمالار مەملەكەتتىك شەكارا ماڭىندا جابىق ەتنيكالىق قاۋىمداستىقتىڭ قۇرىلۋىنا اكەپ سوققان.

«بۇل وڭىردە كورشى ەلدەردىڭ ىقپالى سەزىلەدى. جالپى، قورداي قاقتىعىسى ىقشام وتىرىقشى نەمەسە جابىق ەتنيكالىق توپتار ماسەلەسىن اشىق كورسەتتى. جانجالدىڭ سەبەپتەرى تۋرالى ناقتى تۇسىنىك بار. ەتنيكالىق جاعىنان جابىق قاۋىمداستىقتاردا الەۋمەتتىك، تۇرمىستىق، ەڭبەك جانە قىلمىستىق قاقتىعىستار كوبىنەسە ەتنوسارالىق سيپاتقا يە بولادى. كوپتەگەن جاعدايلاردا قۇقىق قورعاۋ ورگاندارىنىڭ كۇدىكتىلەردى جەدەل ۇستاۋى جانجالدىڭ الدىن الادى. ايتپەسە، جينالعان ەتنوالەۋمەتتىك شيەلەنىس سىرتقا شىعادى»، - دەدى ول.

سونىمەن بىرگە، ەتنوسارالىق قاتىناستار ماسەلەلەرى بويىنشا جۇمىستارعا كوپ وڭىرلەردە جەتكىلىكتى كوڭىل بولىنبەيدى.

«ەلىمىزدە ەتنوسارالىق قاتىناستار سالاسىن رەتتەيتىن زاڭ جوق. «قازاقستان حالقى اسسامبلەياسى تۋرالى» زاڭ ونىڭ قىزمەتىن رەتتەيتىن نەگىزدىك نورمالاردى عانا قامتيدى. مەملەكەتتىك جانە ۇلتتىق ساياسات سالاسىنداعى ۋاكىلەتتى ورگان - اقپارات جانە قوعامدىق دامۋ مينيسترلىگىنىڭ ەتنوسارالىق قاتىناستاردى دامىتۋ دەپارتامەنتى ءالى دە ءتيىمدى جۇمىس ىستەپ وتىرعان جوق. اسسامبلەيانىڭ حاتشىلىعى جانە «قوعامدىق كەلىسىم» رمم مەملەكەتتىك ورگان بولىپ سانالمايدى. ازىرگە جەتكىلىكتى وكىلەتتىك جوق»، - دەدى ج. تۇيمەبايەۆ.

ەسكە سالايىق، 7 - اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى. ق ر پرەزيدەنتى قاسىم- جومارت توقايەۆ بۇزاقىلىق سيپاتتاعى جاپپاي توبەلەستى ايىپتاپ، ارانداتۋشىلار بۇنى ودان سايىن ورشىتكەنىن مالىمدەدى.

قورداي وقيعاسى بويىنشا 120 قىلمىستىق ءىس قوزعالىپ، تەرگەۋ جۇرگىزىلۋدە.

اۆتور ايجان سەرىكجان قىزى