ەرالى توعجانوۆ كوروناۆيرۋس قاۋپى تۋرالى ايتتى

نۇر- سۇلتان. قازاقپارات – ق ر دەنساۋلىق ساقتاۋ مينيسترلىگىنىڭ القا وتىرىسىندا ۇكىمەت باسشىسىنىڭ ورىنباسارى ەرالى توعجانوۆ دارىگەرلەر كوروناۆيرۋس قاۋپىن حالىققا ءتۇسىندىرۋ قاجەتتىگىن ايتتى، دەپ حابارلايدى قازاقپارات ءتىلشىسى.

«دەنساۋلىق ساقتاۋ جۇيەسى ەلباسىنىڭ ەرەكشە قاداعالاۋىندا دەپ ايتسام ارتىق ەمەس. مەديتسينالىق كومەكتىڭ ساپاسىنا، قولجەتىمدىلىگىنە بايلانىستى بىرنەشە ناقتى تاپسىرما بەرىلدى. بيىل دەنساۋلىق ساقتاۋ جۇيەسىندە ەلىمىزدىڭ ءبىر تۇرعىنى ءۇشىن قاراجات 55 تەن 84 مىڭ تەڭگەگە دەيىن ۇلعايعان. بۇل دياگنوستيكالىق جانە مەديتسينالىق قىزمەت تۇرلەرىن قارجىلاندىرۋدى 7 ەسەگە دەيىن، تەگىن بەرىلەتىن ءدارى- دارمەكپەن قامتاماسىز ەتۋدى 2 ەسەگە ۇلعايتۋعا، مەديتسينالىق ۇيىمداردى 100 پايىز مەديتسينالىق تەحنيكامەن قامتاماسىز ەتۋگە مۇمكىندىك بەرەدى. سوندىقتان بۇلاردىڭ بارلىعى اشىعىن ايتقاندا ۇكىمەتتىڭ، مەملەكەتتىڭ تاراپىنان جاسالىپ جاتقان ناقتى شارالار» ، - دەدى ەرالى توعجانوۆ.

ول كوروناۆيرۋس ينفەكتسياسىنىڭ تارالۋىنا بايلانىستى ماسەلەگە دە توقتالدى.

«وڭاي دۇنيە ەمەس. اۋقىمى قانداي دەڭگەيگە جەتكەنىن كورىپ وتىرسىزدار. 40 تان استام مەملەكەتكە تارالعان. قاسىم- جومارت كەمەل ۇلىنىڭ (ق ر پرەزيدەنتى قاسىم- جومارت توقايەۆ) كۇن سايىن تىكەلەي قاداعالاۋىندا دەپ ايتا الامىن. پرەمەر- مينيستر دە كۇن سايىن وسى ماسەلەگە بايلانىستى بىرنەشە رەت وتىرىس وتكىزەدى. ۆەدومستۆوارالىق كوميسسيا كۇن سايىن جيىن وتكىزىپ تۇرادى. اشىعىن ايتقاندا بۇل تەك قانا مەديتسينا سالاسىنىڭ ماسەلەسى ەمەس. بۇكىل مەملەكەتتىك ورگاننىڭ، ەلدىڭ الدىندا تۇرعان ۇلكەن ماڭىزدى ماسەلە سانالادى» ، - دەدى ۇكىمەت باسشىسىنىڭ ورىنباسارى.

پرەمەر- ءمينيستردىڭ ورىنباسارى القا وتىرىسىنا قاتىسقان دارىگەرلەردى كوروناۆيرۋستىڭ قاۋىپتىلىگىن حالىققا ءتۇسىندىرۋ جۇمىستارىنا بەلسەندى قاتىسۋعا شاقىردى.