بۋراباي ماڭىندا ورناتىلاتىن ابىلاي حان مونۋمەنتىنىڭ قۇنى بەلگىلى بولدى

نۇر- سۇلتان. قازاقپارات - بۋراباي ماڭىندا ورناتىلاتىن ابىلاي حانعا ارنالعان مونۋمەنت جوباسىنا كونكۋرس جاريالاندى، دەپ حابارلايدى قازاقپارات ءتىلشىسى.

«بىلتىر قىركۇيەك ايىندا ابىلاي حان بابامىزعا ارنالعان ەلىمىزدە ۇلكەن مونۋمەنت بوي كوتەرسە دەگەن يدەيامەن بولىسكەن ەدىم. الەۋمەتتىك جەلىلەردە بۇل تاقىرىپ بويىنشا قىزۋ تالقىلاۋ بولىپ، سول جەردە ازاماتتاردىڭ 95 پايىزى قولداۋ ءبىلدىردى دەپ ايتسام وتىرىك ەمەس. سونىمەن قاتار، مەملەكەت باسشىلىعى تاراپىنان قولداۋعا يە بولدىق. بۇگىن ۇسىنىلىپ وتىرعانى باستاپقى كەسكىن (ەسكيز) دەپ ايتۋعا بولادى» ، - دەدى قوعام قايراتكەرى ارمان شورايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ سوزىنە قاراعاندا، جارتى جىل مەرزىمدە اتالعان مونۋمەنتتى ورنالاستىرۋ ورنى تىڭعىلىقتى زەردەلەندى.

«وسى ورايدا، سەمەيدە، ۇلىتاۋدا نەمەسە الماتىدا ورناتۋ تۋرالى ۇسىنىستار ايتىلدى. تالقىلاۋلار كەزىندە بۋرابايدىڭ ماڭىندا، بۋراباي مەن كوكشەتاۋدىڭ اراسىنداعى كەنەسارى اۋىلىنىڭ جانىندا 90 مەترلىك جوتانى تاپتىق. وسى مونۋمەنتتىڭ بيىكتىگى شامامەن 50 مەتردى قۇرايدى. سوندىقتان عارىشتان كورىنەتىندەي اۋقىمدى عيمارات بولادى دەپ ويلايمىز. بۇر رەتتە تەك قانا ءمۇسىن ەمەس، ونىڭ تومەنگى بولىگىندە مۋزەي، كوفەرەنتس- حولل بولادى. جالپى بۇل جوبا اقمولا وبلىسىندا، بۋراباي اۋماعىندا تۋريستىك سالانى دامىتۋعا وڭتايلى ىقپال ەتەدى دەپ ويلايمىن» ، - دەدى قوعام قايراتكەرى.

ارمان شورايەۆتىڭ ايتۋىنشا، اتالعان جوباعا قاتىستى ەرتەڭنەن باستاپ حالىقارالىق اشىق كونكۋرس جاريالانادى.

«بۇگىن ۇسىنىلعان ماكەت باستاپقى نۇسقاسى بولىپ سانالادى. كەيبىر ساۋلەتشىلەرمەن جانە مۇسىنشىلەرمەن كەزدەسىپ، جوبانى پىسىقتادىق. كونكۋرستى جاريالاۋدىڭ ماقساتى - قازاقى ناقىشتاعى ەرەكشە نىسانىنىڭ قۇرىلىسىن جۇزەگە اسىرۋ. بۇل نىسان ءوزىن ەلەكتر قۋاتىمەن، جىلۋمەن قامتاماسىز ەتەتىن، ياعني زاماناۋي «جاسىل» تەحنولوگيالار ەنگىزىلگەن جوبا بولسا دەگەن ماقسات بار. مەملەكەتتەن جەر تەلىمىن، سول جەرگە تارتىلعان جولدى سۇرايمىز. نىسان ورنالاساتىن جەر نەگىزگى اۆتوجولدان ءبىر شاقىرىم قاشىقتىقتا بولادى» ، - دەدى ول.

سونىمەن قاتار، جوبانى جۇزەگە اسىرۋ شىعىنىن اسارلاتىپ ەڭسەرۋ جوسپارلانىپ وتىر.

«كونكۋرس ەرتەڭنەن باستالادى، ال ءساۋىر ايىنىڭ 15 ءى كۇنى العاشقى قورىتىندىنى جاسايمىز. كوميسسيا مۇشەلەرى ۇزدىك بەس جوبانى ىرىكتەپ الىپ، ولاردىڭ اۆتورلارىنا ءتيىستى قارجىنى ءبولىپ، ماكەت جاساتامىز. اماندىق بولسا، 7 - مامىردا ەلورداداعى اسكەري مۋزەيدە كونكۋرستى قورىتىندىلايمىز. كوميسسيا قۇرامىندا ماۋلەن اشىمبايەۆ، شوتا ءۋاليحانوۆ، مۇرات اۋەزوۆ، تۇرسىن جۇرتباي، نۇرتورە ءجۇسىپ، دارحان مىڭباي، بەرىك ءابدىعالي، تولەگەن قاجىباي، دوسقان جولجاقسىنوۆ، مۇرات مانسۇروۆ، زيابەك قابىلدينوۆ سەكىلدى نامىسىن نانعا ساتپايتىن ازاماتتار بار» ، - دەدى ارمان شورايەۆ.

ونىڭ اتاپ وتۋىنشە، بۇل مونۋمەنتتى سالىپ، تولىقتاي ىسكە اسىرۋعا شامامەن 5-7 ميلليون ا ق ش دوللارى قاجەت بولادى.

«بۇل جوبا ىسكە قوسىلعاننان كەيىن، الداعى ۋاقىتتا ءوزىن- ءوزى قامتاماسىز ەتەدى. ويتكەنى تۋريستەر كوپتەپ اعىلادى دەپ جوسپارلانۋدا» ، - دەدى قوعام قايراتكەرى.

ەسكە سالا كەتەيىك، بىلتىر قاراشا ايىندا مەملەكەت باسشىسى قاسىم- جومارت توقايەۆ اقمولا وبلىسىن دامىتۋ ماسەلەلەرى جونىندەگى كەڭەستە ابىلاي حانعا ارنالعان مونۋمەنت سالۋ جوباسىن قولداۋ كەرەكتىگىن ايتتى.