13:40, 28 - اقپان 2020 | GMT +6
مەملەكەت باسشىسى اسقار جۇماعاليەۆكە ءبىرقاتار ناقتى تاپسىرما بەردى
نۇر-سۇلتان. قازاقپارات - قازاقستان پرەزيدەنتى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆتى قابىلدادى، دەپ حابارلايدى اقوردا.
كەزدەسۋ بارىسىندا قاسىم-جومارت توقايەۆقا مەملەكەتتىك قىزمەتتەردى اۆتوماتتاندىرۋ، تەلەكوممۋنيكاتسيالىق ينفراقۇرىلىمدى، يننوۆاتسيالىق ەكوجۇيەنى جانە ادامي كاپيتالدى دامىتۋ، ەكونوميكا سالالارىن سيفرلاندىرۋ بويىنشا جۇرگىزىلىپ جاتقان جۇمىستار تۋرالى باياندالدى.
اسقار جۇماعاليەۆ مەملەكەت باسشىسىنا 250 دەن اساتىن تۇرعىنى بار ەلدى مەكەندەردىڭ بارلىعى وسى جىلدىڭ سوڭىنا دەيىن جوعارى جىلدامدىقتى موبيلدى ينتەرنەتپەن قامتاماسىز ەتىلەتىنىن جەتكىزدى.
سونىمەن قاتار قازاقستان پرەزيدەنتىنە قالالاردى سيفرلاندىرۋ جانە اقپاراتتىق قاۋىپسىزدىك سالاسىنداعى اتقارىلىپ جاتقان جۇمىستار تۋرالى مالىمەت بەردى.
كەزدەسۋ سوڭىندا قاسىم-جومارت توقايەۆ اسقار جۇماعاليەۆكە ءبىرقاتار ناقتى تاپسىرما بەردى.