الماتى وبلىسىندا بىرنەشە جارىستا جەڭىسكە جەتكەن اعىلشىن-اراب تۇقىمدى جىلقى ۇرلاندى

تالدىقورعان. قازاقپارات- الماتى وبلىسىندا بىرنەشە جارىستا جەڭىسكە جەتكەن اعىلشىن- اراب تۇقىمدى جىلقى ۇرلاندى، - دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 26-اقپاندا كەگەن اۋدانى پوليتسيا ءبولىمىنىڭ كەزەكشى بولىمىنە اقساي اۋىلىنىڭ 87 جاستاعى تۇرعىنى ءۇيىنىڭ قوراسىنان ءوزىنىڭ اعىلشىن- اراب تۇقىمدى، ءارتۇرلى جارىستاردىڭ بىرنەشە دۇركىن جۇلدەگەرى بولعان جىلقىسىنىڭ ۇرلانعانى تۋرالى ارىزبەن جۇگىندى.

جەدەل- ىزدەستىرۋ ءىس- شارالارىنىڭ ناتيجەسىندە پوليتسيا قىزمەتكەرلەرى ەكى كۇدىكتى ازاماتتى ۇستادى. ءبىرى، 2001 -جىلى تۋعان كەگەن اۋدانىنىڭ تۇرعىنى، ەكىنشىسى 25 جاستاعى الماتى قالاسىنىڭ تۇرعىنى. ۇستالعان ازاماتتار جىلقىنىڭ قۇندى تۇقىمدى ەكەنىن بىلە تۇرا، ونى جۇك كولىگىمەن اۋداننان تىس جەرگە شىعارىپ، بەلگىسىز تۇلعاعا ساتقانىن مويىندادى. قازىرگى ۋاقىتتا ۇستالعان ازاماتتار ۋاقىتشا ۇستاۋ يزولياتورىندا قاماۋدا وتىر. جىلقىنى ىزدەۋ جۇمىستارى باستالدى.

ۇرلىق فاكتىسى سوتقا دەيىنگى تەرگەۋدىڭ ءبىرىڭعاي تىزىلىمىنە ق ر ق ك 188-1 ب.3 ت.2 ب تىركەلدى.