تۇركىستان وبلىسىندا ادەپسىز اكىم پارتيا قاتارىنان شىعارىلدى
قاراسۋ اۋىلدىق وكرۋگى اكىمىنىڭ ە. بەكبەرديەۆتىڭ جاۋاپكەرشىلىگى پارتيانىڭ اتالعان اۋداندىق فيليالى ساياسي كەڭەسى بيۋروسىنىڭ ماجىلىسىندە قارالدى، دەپ حابارلايدى قازاقپارات ءتىلشىسى.
بەلگىلى بولعانداي، قاراسۋ اۋىلدىق وكرۋگىنىڭ اكىمى سوڭعى 6 ايدا «اكىمشىلىك قۇقىقبۇزۋشىلىق تۋرالى» كودەكسىنىڭ تالاپتارىن ساقتاماعانى ءۇشىن 2 رەت اكىمشىلىك جاۋاپقا تارتىلعان. سونداي-اق، وعان قاتىستى وزىنە جۇكتەلگەن مىندەتتەردى ءتيىستى دارەجەدە ورىنداماۋ مەن قازاقستان رەسپۋبليكاسى مەملەكەتتىك قىزمەتشىلەرىنىڭ ادەپ كودەكسى تالاپتارىن ساقتاماعانى ءۇشىن «سوگىس»، «قىزمەتىنە تولىق سايكەس ەمەستىگى تۋرالى ەسكەرتۋ» تۇرىندە ەكى تارتىپتىك شارا قولدانىلعان.
اتاپ ايتقاندا. سايرام اۋداندىق پروكۋراتۋراسى تاراپىنان جۇرگىزىلگەن تالداۋ ناتيجەسىمەن اۋىل اكىمى جاڭا فورماتتاعى اتاۋلى الەۋمەتتىك كومەككە مۇقتاج رەتىندە ءوتىنىش بىلدىرگەن 851 كوپبالالى جانە از قامتىلعان وتباسىنىڭ وتىنىشتەرىن 2019 -جىلدىڭ ءساۋىر ايىنان باستاپ شىلدە ايىنا دەيىن سەبەپسىز جۇمىسپەن قامتۋ ورتالىعىنا جولداماعان. ياعني، 7 جۇمىس كۇن ىشىندە جولدانۋى ءتيىس قۇجاتتار 4 ايعا جۋىق جولدانباي، كومەككە مۇقتاج وتباسىلاردىڭ ماسەلەلەرىنە نەمقۇرايلىق تانىتقان.
بۇدان بولەك، تۇرعىندار تاراپىنان ە. بەكبەرديەۆ پەن اكىمدىك اپپاراتىنىڭ جۇمىسىنا قاتىستى 10 ارىز-شاعىم تۇسكەن. ءماجىلىس قورىتىندىسى بويىنشا قاراسۋ اكىمى «Nur Otan» پارتياسىنىڭ مۇشەسى بولۋعا لايىقتى ەمەس دەگەن شەشىم قابىلداندى.