العىس ايتۋ كۇنىنە وراي «ءبىر ەل- ءبىر تاعدىر» اتتى فورۋم ءوتتى
كوكشەتاۋ قالاسىنداعى قوعامدىق كەلىسىم سارايىندا قازاقستان حالقى اقمولا اسسامبلەياسىنىڭ جۇمىسى تۋرالى بەينەفيلمى جانە نازاربايەۆ زياتكەرلىك مەكتەبى وقۋشىلارىنىڭ ارنايى قويىلىمدارىمەن اشىلعان فورۋمعا مەملەكەتتىك ورگانداردىڭ باسشىلارى، قازاقستان حالقى اقمولا اسسامبلەياسىنىڭ مۇشەلەرى، وبلىستىق ەتنومادەني بىرلەستىكتەردىڭ باسشىلارى، «جاڭعىرۋ جولى» جاستار قاناتىنىڭ وكىلدەرى، ستۋدەنتتەر مەن وقۋشىلار قاتىستى.
«قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ 2015 -جىلى 1-ناۋرىز - قازاقستان حالقى اسسامبلەياسىنىڭ قۇرىلعان كۇنىن جىل سايىن بارلىق ەتنوستاردىڭ ءبىر- بىرىنە مەيىرباندىق تانىتىپ، ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى دەپ اتاۋ جونىندە ۇسىنىس ايتقان بولاتىن. بۇل مەرەكە سودان بەرى قاتارىنان بەس جىل قاتارىنان اتالىپ ءوتىپ كەلەدى.
بيىلعى جىلى قازاقستان حالقى اسسامبلەياسىنىڭ قۇرىلعانىنا 25 جىل تولىپ وتىر. تاۋەلسىز دامۋ جىلدارىن وتكەرگەن قازاقستاندىق جول - تۇتاستىعىن ساقتاماي تۇراقتى جانە كۇشتى مەملەكەت قۇرۋ مۇمكىن ەمەستىگىنىڭ ناقتى دالەلىنە اينالدى. ءبىزدىڭ بۇگىنگى نەگىزگى مىندەتىمىز ەتنوسارالىق كەلىسىم مەن بىرلىكتى ساقتاۋ جانە نىعايتۋ بولىپ تابىلادى»، - دەي كەلە، ايماق باسشىسى ەرمەك مارجىقپايەۆ وڭىردە اقمولالىقتار تاراپىنان جۇزەگە اسىرىلىپ جاتقان قايىرىمدى ىستەر تۋرالى ايتىپ ءوتتى.
وسى رەتتە، اۋىلداستارىنىڭ ءومىر جاقسارتۋعا اتاسالىسىپ كەلە جاتقان يۆان ساۋەر، ءۋاليحان ءارىپوۆ، الەكساندر زاكۋسيلوۆ، جامۋل مۋسحانوۆ، ۆلاديمير ستيحيلياس، ۆالەري تيۋركين، گۇلناز قابىكەيەۆا، بوريس كوزلوۆ، سايرا ماتايبايەۆا، التىنبەك قۇرمانكۇلوۆ، ماگامەد ابۋيەۆ سياقتى ازاماتتاردىڭ ەسىمدەرىن ايتىپ، العىس ءبىلدىردى.
شارا بارىسىندا قازاقستان حالقى اسسامبلەياسىنىڭ مۇشەسى بولات ءجانادىلوۆ، اتباسار جانە ساندىقتاۋ اۋداندارىنداعى «ۆايناح» شەشەن- ينگۋش ەتنومادەني ورتالىعىنىڭ اقساقالى اۋباكىر زاراحوۆ، قازاقستان حالقى اسسامبلەياسىنىڭ مۇشەسى، استراحان اۋداندىق «ماياك» گازەتىنىڭ رەداكتورى ليديا چەرنەگا، قازاقستان حالقى اقمولا اسسامبلەياسى جانىنداعى «جاڭعىرۋ جولى» جاستار قوزعالىسىنىڭ ءتوراعاسى اسلان ءابىتالىپوۆ ءسوز سويلەپ، قيىن كەزدە وزگە ۇلتتاردى باۋىرىنا باسقان قازاق حالقىنا شەكسىز العىستارىن ءبىلدىردى.
اۆتور: اسلان وسپانوۆ