ەلىمىزدە پارانىڭ مولشەرى ءوستى - اتامەكەن ۇ ك پ

نۇر-سۇلتان. قازاقپارات - ەلىمىزدە سىبايلاس جەمقورلىققا قاتىسى بار كاسىپكەرلەر سانى ازايعانمەن، پارانىڭ مولشەرى وسكەن.بۇل تۋرالى ەلوردادا وتكەن رەسپۋبليكالىق كاسىپكەرلەر فورۋمىندا ايتىلدى، دەپ حابارلايدى قازاقپارات ءتىلشىسى.

«ءبىز 2019 -جىلى سىبايلاس جەمقورلىق دەڭگەيىن انىقتاۋ ءۇشىن ناقتى الەۋمەتتىك زەرتتەۋ جۇرگىزدىك. زەرتتەۋ قورىتىندىسى بويىنشا پارانىڭ ورتاشا مولشەرى، سىبايلاس جەمقورلىق مولشەرى ەڭ جوعارى ايماقتار، پارانى كوپ الاتىن مەملەكەتتىك ورگاندار انىقتالدى»، - دەيدى «اتامەكەن» ق ر ۇلتتىق كاسىپكەرلەر پالاتاسى باسقارما ءتوراعاسىنىڭ مىندەتىن اتقارۋشى ەربول ۇستەمىروۆ.

ونىڭ ايتۋىنشا، سىبايلاس جەمقورلىقپەن قاتىسى بار كاسىپكەرلەر سانى تومەندەگەن.

«سىبايلاس جەمقورلىقپەن قاتىسى بار كاسىپكەرلەر سانى تومەندەگەنمەن، جالپى پارانىڭ ورتاشا مولشەرى وسكەن. 2018 -جىلى پارانىڭ ورتاشا مولشەرى 193 مىڭ تەڭگە بولسا، 2019 -جىلدىڭ قورىتىندىسى بويىنشا 205 مىڭ تەڭگەگە وسكەن»، - دەيدى ول.

سونداي-اق، ەربول ۇستەمىروۆ 2019 -جىلدىڭ قورىتىندىسى بويىنشا سىبايلاس جەمقورلىق ەڭ كوپ ايماقتاردى اتادى.

«باتىس قازاقستان، ماڭعىستاۋ، اتىراۋ وبلىسى، قىزىلوردا ولىستارىندا سىبايلاس جەمقورلىق دەڭگەيى جوعارى بولسا، قوستاناي، قاراعاندى، شىعىس قازاقستان وبلىستارى مەن نۇر- سۇلتان قالاسىندا سىبايلاس جەمقورلىق دەڭگەيى تومەن» - دەپ اتاپ ءوتتى ەربول ۇستەمىروۆ.