كوروناۆيرۋس: فەيك اقپاراتتار جىلدام تاراپ جاتىر

نۇر-سۇلتان. قازاقپارات - كوروناۆيرۋستىڭ جاڭا ءتۇرىنىڭ تارالۋىنا بايلانىستى وعان قاتىستى اقپاراتتاردىڭ ماڭىزى ارتا ءتۇستى.

الەۋمەتتىك مەديا عاسىرىندا بۇل Facebook پەن YouTube قا ۇلكەن جاۋاپكەرشىلىك جۇكتەيدى، دەپ حابارلايدى قازاقپارات bbc گە سىلتەمە جاساپ.

«بۇگىنگى تاڭدا ميللياردتاعان ادام وسى ەكى پلاتفورمادان اقپارات ىزدەيدى. بۇل ەكى جەلى جالعان اقپارات تاراتۋشىلار ءۇشىن دە اشىق الاڭعا اينالدى. مىسالى، Facebook توپتاردا ۆاكسيناعا قارسى جالعان اقپارات پەن 5G جەلىسىنە قارسى ادامداردىڭ فەيك جاڭالىقتارى جىلدام تارادى»، - دەپ جازادى باسىلىم.

اۆتوردىڭ ايتۋىنشا، ءتىپتى بۇل ەكى تاقىرىپتاردى كوروناۆيرۋسپەن بايلانىستىرۋشىلار قاتارى دا كوبەيگەن.

«Youtube-تە كوروناۆيرۋس پايدا بولعانعا دەيىن ءبىر اپتا بۇرىن 5G ەنگىزىلگەنى تۋرالى اقپارات تارادى. سونىمەن قاتار، Diamond Princess كرۋيز لاينەرى ءدال وسى جەلىنى پايدالانعاندىقتان، لاينەر جولاۋشىلارى ۆيرۋس جۇقتىرعان دەۋشىلەر دە بار. تاعى بىرەۋلەر ۆيرۋستى امەريكا نەمەسە قىتاي ۇكىمەتى بىرىگىپ زەرتحانادا ادەيى جاساعان دەگەن دە تەوريا تاراعان. سونىمەن قاتار كوروناۆيرۋس بيولوگيالىق قارۋ جاساۋ بارىسىندا پايدا بولعان دەگەن جالعان اقپاراتتار دا وسى جەلىلەر ارقىلى كەڭ تارادى»، - دەپ جازادى اۆتور.

ونىڭ ايتۋىنشا، الەۋمەتتىك جەلىلەر دەزينفورماتسيامەن كۇرەسۋگە بارىنشا تىرىسىپ جاتقانىمەن، بۇل جەلىلەردەگى جالعان اقپارات ءالى دە سۇرانىسقا يە تاۋارعا اينالىپ وتىر.

اۆتور: ايكۇمىس بولاتبەك