اق ايۋ كۇنى: الماتىلىق الكور قالاي تۇرىپ جاتىر

الماتى. قازاقپارات - الماتى زووباعىندا بۇگىن پوليارلىق ايۋ كۇنى اتالىپ ءوتتى، دەپ حابارلايدى قازاقپارات ءتىلشىسى.

الماتى زووباعىندا الكور اتتى جالعىز اق ايۋ بار. مەرەكەگە وراي كۇتۋشىلەر وعان جەمىس، بالىق، ەت قوسىلعان تورت ازىرلەپ بەردى.

بىلتىر الكور 30 جاسقا تولعان ەدى. بۇل جانۋار 1989 -جىلى رەسەيدىڭ كالينينگراد زووباعىندا تۋعان ەدى. اق قونجىق الماتى زووباعىنا تۇڭعىش رەت 1990 -جىلى جەتكىزىلگەن بولاتىن.

2017 -جىلى زووباقتى قايتا جاڭعىرتۋ جوباسى اياسىندا الكور الەمدىك ستاندارتتارعا ساي تورى جوق ۆولەرگە كوشىرىلدى.

ونىڭ قونجىعى ۋمكا قازىر چەح زووباعىندا تۇرىپ جاتىر.

ايتا كەتۋ كەرەك، پوليارلىق ايۋلار زووباقتا 40 جىلعا جۋىق ءومىر سۇرەدى. ال جابايى تابيعات اياسىندا 20-30 جاس ءومىر سۇرەدى.

جىل سايىن 27-اقپاندا دۇنيەجۇزى پوليارلىق ايۋ كۇنىن اتاپ وتەدى (International Polar Bear Day).

عالىمداردىڭ زەرتتەۋىنشە، الەمدە قازىر 20-25 مىڭ اق ايۋ قالعان. ولاردىڭ سانىنىڭ قىسقارۋىنا قازىر ەڭ باستىسى مۇزدىڭ جىلدام ەرۋى اسەر ەتۋدە.

ەگەر جەر بەتىنىڭ جاھاندىق جىلىنۋى وسى قارقىنمەن جۇرە بەرەتىن بولسا 2050 -جىلعا تامان الەمدە 3/1 ى عانا قالۋى مۇمكىن.

سونىمەن قاتار، ولارعا مۇناي كەن ورىندارىن يگەرۋ جۇمىستارى قاۋىپ ءتوندىرىپ وتىر.

2008 -جىلى مامىردا ا ق ش اق ايۋدى قىزىل كىتاپقا ەنگىزدى.

اۆتور: گۇلميرا عوسمانالي