كوروناۆيرۋس قازاقستانعا كەلمەيدى دەپ ايتا المايمىن - مينيستر

نۇر-سۇلتان. قازاقپارات - قازاقستانعا كوروناۆيرۋستىڭ كەلۋ تاۋەكەلى جوعارى.

بۇل تۋرالى بۇگىن ب ا ق وكىلدەرىمەن كەزدەسكەن ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.

«قازاقستاندا كوروناۆيرۋس بولعان جاعدايدا ونى جاسىرىپ وتىرۋ مۇمكىن ەمەس. قازىر ەلىمىزدە كوروناۆيرۋس جوق. ءبىراق، ول قازاقستانعا كەلمەيدى دەپ ايتا المايمىن. ونىڭ سەبەبى - تاۋەكەلى وتە جوعارى. ءبىز ەلىمىزدە وسىنداي ناۋقاستار بولسا، ينفەكسيا تارالسا دەپ قاجەتتى شارالاردى دايىنداپ جاتىرمىز. ول دايىندىق وتە ماڭىزدى. وزدەرىڭىزدە كورىپ وتىرسىزدار، دۇنيەجۇزىلىك دەنساۋلىق ساقتاۋ ۇيىمى، باسقا دا مەملەكەتتەردىڭ باسشىلارى ەڭ ماڭىزدى ماسەلە - الدىن الۋ ەككەندىگىن ايتىپ جاتىر. ماسەلەن، بۇگىن گەرمانيا ۇكىمەتىنىڭ باسشىسى ەلدە ەپيدەميا باستالعاندىعىن جاريالادى»، - دەدى مينيستر.

ونىڭ اتاپ وتۋىنشە، كوروناۆيرۋس دۇنيەجۇزىنە جىلدام تارالىپ جاتقان ينفەكسيالىق اۋرۋ سانالادى.

«بۇل ينفەكسيانىڭ ەرەكشەلىگى سوندا. ءبىراق، جۇقتىرعان ادامنىڭ بارلىعى ءولىپ كەتەدى دەۋ دۇرىس ەمەس. وعان سەنبەڭىزدەر. جالپى، باسقا دا ينفەكسيالىق اۋرۋلار بىزدە جىل سايىن بولادى. قىزىلشا، تىرىسقاق كەلەدى. مۇنداي جاعدايدا ناقتى شارالار سانيتارلىق قىزمەت تاراپىنان قابىلدانادى. زاڭعا سايكەس سانيتارلىق قىزمەتتىڭ مۇنداي مۇمكىنشىلىگى بار. سانيتارلىق دارىگەر ايتقان كەڭەستەردى قولداۋ كەرەك. سوندا قاۋىپتى جاعدايدى تومەندەتۋگە مۇمكىندىك بولادى. ۇرەي شاقىراتىن، قورقاتىن ەشتەڭەسى جوق. بۇل كادىمگى ينفەكسيالىق اۋرۋ. كوز جۇمعانداردىڭ سانى 100 ادامنىڭ ىشىندە 3 پايىز عانا. ونىڭ كوبىسى سوزىلمالى اۋرۋمەن اۋىراتىن قارت ادامدار، يممۋنيەتتى تومەن ادامدار. بالالارىمىز اۋىرىپ، قايتىس بولادى دەگەن فەيك اقپارات. وعان سەنبەڭىزدەر. بۇكىل قاجەتتى اقپاراتتى بەرىپ تۇرامىز. سونى تىڭداپ، باقىلاۋدا ۇستاۋ قاجەت. باسقا تاراعان اقپاراتقا سەنبەڭىزدەر»، - دەدى ەلجان ءبىرتانوۆ.

اۆتور: مارلان جيەمباي