الماز شارمان كوروناۆيرۋس ينفەكسياسى قانداي جولدارمەن جۇعاتىنىن ءتۇسىندىردى

نۇر-سۇلتان. قازاقپارات - تانىمال مەديتسينالىق پروفەسسور الماز شارمان كوروناۆيرۋس ينفەكسياسىن جۇقتىرىپ الماۋعا قاتىستى اقىل- كەڭەسىمەن ءبولىستى، دەپ حابارلايدى قازاقپارات ءتىلشىسى.

«كوروناۆيرۋس ينفەكسياسىنىڭ تارالۋى پاندەمياعا ءتان سيپاتقا يە بولىپ بارا جاتقان سەكىلدى. قازىردىڭ وزىندە ءتيىستى قورعانىس شارالارىن قابىلداۋ كەرەك. ەڭ الدىمەن ايعاي-سۇرەڭ مەن جالعان اقپارلارعا سەنبەۋگە شاقىرار ەدىم. شىنايى اقپاراتقا سۇيەنىپ، ينفەكسيانىڭ قانداي جولمەن تارايتىنىن انىقتاپ العان ابزال. كوروناۆيرۋس جۇقتىرعان اداممەن جاقىن قارىم-قاتىناستا بولعان جاعدايدا جوتەل نەمەسە تۇشكىرۋ كەزىندە، ياعني اۋا ارقىلى قۇرامىندا ۆيرۋسى بار سىلەكەي ارقىلى جۇعادى. بۇل تامشىلار كىسىنىڭ جانىندا تۇرعان ادامعا جەتىپ، قاسىنداعى ادام ونى جۇتىپ قويۋى مۇمكىن»، - دەپ جازادى الماز شارمان Facebook پاراقشاسىندا.

ونىڭ ايتۋىنشا، ۆيرۋسى بار ادامنان 2 مەتر عانا قاشىقتىقتا تۇرعان كىسى 10 مينۋتتىڭ ىشىندە ءوزى دە كوروناۆيرۋس ينفەكسياسىن جۇقتىرۋى مۇمكىن.

«سونىمەن بىرگە، ۆيرۋستى تامشىلار ءارتۇرلى زاتتاردىڭ بەتىنە دە، ماسەلەن اۆتوبۋستىڭ ورىندىعىنا، كىتاپ پەن كلاۆياتۋراعا، تىنتۋىرگە شاشىراۋى ىقتيمال. سول ءۇشىن ءاردايىم قولىڭىزدى تازا سۋمەن جۋىپ وتىرعان ءجون. الاقاندى ىسقىلاي جۋىپ، بۋىننىڭ سىرتقى بولىگىندە، ساۋساقتار مەن تىرناق ءىشىن دە تازالاپ وتىرۋ كەرەك. قولدى شامامەن 20 سەكۋندتان ارتىق جۋۋ كەرەك. جوتەلگەن نەمەسە تۇشكىرگەن كەزدە مۇرنىڭىز بەن اۋزىڭىزدى مەيلىنشە سالفەتكامەن جابۋعا تىرىسىڭىز. قولدانىلعان سالفەتكانى بىردەن لاقتىرىپ وتىرۋ كەرەك. ەگەر قاسىڭىزدا سالفەتكا بولماسا، اۋزىڭىزدى الاقانىڭىزبەن ەمەس، شىنتاقپەن جابۋعا تىرىسىڭىز»، - دەيدى پروفەسسور.

بۇدان بولەك الماز شارمان قاراپايىم مەديتسينالىق ماسكالار جەتكىلىكتى دارەجەدە قورعاي المايتىنىن ايتادى.

«الايدا ماسكالار كىشكەنتاي اەروزولدى بولىكتەردەن ساقتاي المايدى. سونىمەن قاتار ماسكا كوزدى دە قورعاي المايدى. كوز ارقىلى دا ۆيرۋس اعزاعا ەنىپ كەتۋى ىقتيمال. باسقاشا ايتقاندا ماسكالار كوروناۆيرۋس ينفەكسياسىنان جەتكىلىكتى دارەجەدە قورعاي المايدى»، - دەدى ول.