تۇركيا كوروناۆيرۋسكە قارسى شارالاردى كۇشەيتتى
ويتكەنى، تۋىستاس مەملەكەتتىڭ ەكى بىردەي كورشىسى يران مەن يراكتا جۇقپالى COVID-19 ۆيرۋسى تىركەلدى. وسىعان بايلانىستى تۇركيا ۇكىمەتى يرانمەن بارلىق ساپارلارىن توقتاتىپ، ەلدەگى ازاماتتارىن ەۆاكۋاتسيالاۋعا كوشتى.
مەرۋەرت قاناعات، ءتىلشى:
- تۇركيادا كوروناۆيرۋس جۇقتىرعاندار جوق. الايدا، كەشە تەگەراننان ىستامبۇلعا بەت العان تۇرىك اۋە جولدارى ۇشاعى انكاراعا شۇعىل قونۋعا ءماجبۇر بولدى. وعان ۇشاقتاعى 12 جولاۋشىنىڭ دەنە قىزۋىنىڭ كوتەرىلۋى سەبەپ. وسىعان بايلانىستى 132 جولاۋشى مەن ەكيپاج مۇشەسىنىڭ تۇگەلى اۋرۋحاناعا جاتقىزىلدى. ولار 14 كۇن بويى مەديتسينالىق تەكسەرىستەن وتەدى.
تۇرىك ەلىندە قاتەرلى ۆيرۋسپەن كۇرەسۋ شارالارى جىل باسىنان باستالعان. ويتكەنى انادولى ەلىنىڭ تابىس كوزدەرىنىڭ ءبىرى - تۋريزم. سوندىقتان بيلىك قاۋىپسىزدىك شارالارىن كۇشەيتكەن. وسى سەبەپتى، COVID-19 ۆيرۋسىمەن كۇرەسۋ ماقساتىندا ءبىر اۋرۋحانا بوساتىلىپ، ازىرلەندى. ترانزيتتىك اۋەجايلارعا دەنساۋلىق ساقتاۋ مينيسترلىگى ارنايى توپ قۇرىپ، تاۋلىك بويى تەكسەرىس جاساپ وتىر.
22 - قاڭتاردا ەلدىڭ دەنساۋلىق ساقتاۋ مينيسترلىگى قۇرامىندا قۇرىلعان «كوروناۆيرۋس ءبىلىم كەڭەسى» داعدىلى تۇردە قاتەرلى ىندەتتىڭ الدىن الۋعا ارنالعان جول كارتاسىن بەلگىلەپ كەلەدى. ول بويىنشا ارنايى نۇسقاۋلىقتار جاريالاپ، قوعامدىق جەرلەردى دەزينفەكسيادان وتكىزدى. اسىرەسە، شارالار كۋرورتتىق ايماقتاردا كۇشەيتىلگەن. جالپى جەرگىلىكتى تۇرعىندار ىشىندە كوروناۆيرۋسقا قاتىستى قاتتى ۇرەي بايقالمايدى. سىرتتا بەتپەردەمەن جۇرەتىن ادامداردىڭ سانى جوقتىڭ قاسى.
وسىعان دەيىن بىرنەشە رەت ەلدە ۆيرۋستىڭ شىققاندىعى جونىندە اقپارات تاراعان. ىستامبۇل مەن دەنيزلي سەكىلدى قالالاردا ءبىر توپ قىتايدان كەلگەن تۋريستەردىڭ دەنە قىزۋىنىڭ كوتەرىلىپ، اۋرۋحاناعا جەتكىزىلگەندىگى جونىندە اقپارات جاريالانعان بولاتىن. الايدا، ەل ۇكىمەتى COVID-19 ۆيرۋسىنىڭ انىقتالماعاندىعىن جەتكىزگەن.
رەجەپ تايىپ ەردوعان، تۇركيا رەسپۋبليكاسىنىڭ پرەزيدەنتى:
- دەنساۋلىق سالاسىنداعى شارالاردى جوعارى ۇستاۋىمىز مىندەت. ماسەلەگە قاتىستى دەنساۋلىق ساقتاۋ مينيسترلىگى مەن «كوروناۆيرۋس ءبىلىم كەڭەسىنىڭ» قابىلداعان شەشىمدەرىن تولىق ورىندايمىز. يرانعا قاتىستى قابىلداعان قاراردى دا قوس مەكەمەنىڭ نۇسقاۋلىعىنا سايكەس قابىلدادىق. ويتكەنى ول مەملەكەتتەن ەلىمىزگە كوروناۆيرۋس كەلۋى تۇركيا ءۇشىن ۇلكەن قاۋىپ دەگەن ءسوز.
كوروناۆيرۋس ەل نارىعىنا قاتتى اسەر ەتكەن جوق. سەبەبى، حالىققا قاجەتتى تۇرمىس زاتتارىنىڭ دەنى ەلدە شىعارىلادى. تەك قىتايدان ۇساق- تۇيەك زاتتاردى ساتاتىن دۇكەن سورەلەرى بوساپ قالدى. بۇل ءوز كەزەگىندە جەرگىلىكتى كاسىپكەرلەرگە ءتيىمدى بولىپ وتىر.