ۋحاندا كوروناۆيرۋس كۇدىگىمەن ۇشاققا جىبەرىلمەگەن قازاقستاندىقتىڭ قازىرگى جاعدايى قالاي
بۇل تۋرالى بۇگىن ب ا ق وكىلدەرىمەن كەزدەسكەن ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«بۇگىن سىرتقى ىستەر مينيسترلىگىنەن كەلگەن اقپاراتقا سايكەس، دەنە قىزۋىنا بايلانىستى ۋحان اۋەجايىندا ۇشاققا جىبەرىلمەگەن ستۋدەنت قىزىمىزعا قاتىستى اقپارات ءتۇستى. وعان بىرنەشە زەرتتەۋ جۇرگىزىلىپ، مونيتورينگ جاسالعان. ودان ۆيرۋس تابىلعان جوق. ونىڭ دەنى ساۋ. بۇل وتە جاقسى جاڭالىق»، - دەدى مينيستر.
ايتا كەتەيىك، بۇعان دەيىن ق ر دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ ۋكراينا اۋە جەلىلەرى ۇشاعىمەن قىتايدىڭ ۋحان قالاسىنان ەلىمىزگە جەتكىزىلۋى ءتيىس ستۋدەنت قىزدىڭ بورتقا جىبەرىلمەگەندىگىن ايتقان بولاتىن.
«ەكىنشى ستۋدەنت قىز دا وسى رەيسپەن ۇشىپ كەلۋى ءتيىس ەدى. ءبىراق، ۇشاققا وتىرعىزار ساتتە ونىڭ دەنە قىزۋى 37 گرادۋس ەكەندىگى انىقتالدى جانە قىتاي بيلىگى ونى بورتقا جىبەرمەدى. سەبەبى بۇل قىتاي بيلىگى تاراپىنىڭ ستاندارتتى شاراسى سانالادى. ازىرشە، ول ۋحان قالاسىندا. ءبىز ونىڭ دەنساۋلىعىن قاداعالاپ وتىرامىز»، - دەگەن ەدى مينيسترلىك وكىلى.