ەلجان ءبىرتانوۆ كوروناۆيرۋستىڭ تارالۋىنا جول بەرمەۋدىڭ ءادىسىن اتادى
بۇل جايىندا بۇگىن ب ا ق وكىلدەرىمەن كەزدەسكەن ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«كوروناۆيرۋس بويىنشا ەڭ ءبىرىنشى مىندەت ولاردىڭ ەلگە اكەلۋىنە جول بەرمەۋ بولدى. سوندىقتان 6 - قاڭتاردا ءۇش كەزەڭمەن كۇشەيتۋ جۇمىستارى جۇرگىزىلدى. سول كۇنى قازاقستان مەن قىتاي شەكاراسىندا، 1 - اقپاننان بۇكىل رەسپۋبليكا شەكاراسىندا مونيتورينگ جۇرگىزە باستادىق. 20- اقپاننان قاۋىپتى ەلدەر ءتىزىمىن ۇلعايتتىق. قىتايدان بولەك وعان ءبىرقاتار ەل كىردى. بىزدە شەكارادان وتكەن ءاربىر ادامعا قاتىستى مالىمەتتەر بازاسى بار. بىرەۋلەر «تەپلوۆيزوردان وتپەدىم، ساۋالناما تولتىرمادىم» ، دەپ جاتادى. مۇنداي بىرەن- ساران دەرەك بار. بۇل ايتا قويارلىقتاي ۇلكەن پروبلەما ەمەس» ، - دەدى مينيستر.
ونىڭ اتاپ وتۋىنشە، كۇن سايىن ءاربىر ءوڭىر مينيسترلىككە ەسەپ بەرىپ وتىرادى. قىتايدان كەلەتىن ادامدار دا تۇراقتى مونيتورينگتەن وتەدى. ماسەلەن، وسى كۇنگە دەيىن قىتايدان كەلگەن 24 مىڭ ادامنىڭ جارتىسى 14 كۇندىك كارانتيننەن وتكەننەن كەيىن مونيتورينگتەن شىعارىلدى.
«قىتايدان كەلگەن 185 ادام ادام كاراتيندە جاتىر. 1 - ناۋرىزدان باستاپ بىزدە ءتىزىلىم كەڭەيتىلەدى. وعان وڭتۇستىك كورەيا، يتاليا، يران جانە جاپونيا ازاماتتارى كىرەدى. تاعى دا قايتالاپ ايتامىز، ءبىز ولاردىڭ بارلىعىن اۋرۋحاناعا جاتقىزۋدى جوسپارلاپ وتىرعانىمىز جوق. ناقتى اۋرۋ بەلگىسى بار ادامدار عانا مەديتسينالىق تۇرعىدا وقشاۋلانادى. وزدەرىن جاقسى سەزىنگەن ادامدار ۇيلەرىندە باقىلاۋدا بولادى. ەڭ ماڭىزدىسى، ينفەكتسيانىڭ ەلگە كەلۋىنە جانە ونىڭ تارالۋىنا جول بەرمەۋدىڭ ءبىر عانا ءتاسىلى بار ەكەنىن ەستە ۇستاۋ قاجەت. ول ءۇشىن الەۋەتتى تاۋەكەلى بار ادامدار ەشكىممەن بايلانىسقا شىقپاي 14 كۇن ۇيلەرىندە بولۋى قاجەت. ويتكەنى، ول بىرەۋلەرمەن ارالاسىپ، 10 كۇننەن كەيىن وندا اۋرۋ بەلگىلەرى شىقسا، بىزگە ونىمەن بايلانىستا بولعان ادامداردڭ بارلىعىن ىزدەپ تاۋىپ، وقشاۋلاۋعا تۋرا كەلەدى» ، - دەدى ەلجان ءبىرتانوۆ.