لاتىن امەريكاسى مەن فينليانديادا كوروناۆيرۋس جۇقتىرعان العاشقى جاعداي تىركەلدى
لاتىن امەريكاسىندا كوروناۆيرۋستى العاش جۇقتىرعان برازياليالىق سان- پاۋلۋ قالاسىنىڭ 61 جاستاعى تۇرعىنى. اگەنتتىكتىڭ مالىمەتىنشە، ول اقپاننىڭ 9-21 -ارالىعىندا يتاليانىڭ سولتۇستىگىندەگى لومبارديادا بولعان. وتكەن جۇما كۇنى ساپاردان ەلگە ورالعاننان كەيىن ودان كوروناۆيرۋس بەلگىلەرى انىقتالعان. اتاپ ايتساق، دەنە قىزۋى كوتەرىلگەن، قۇرعاق جوتەل، تاماعى اۋىرىپ، تۇماۋ بولعان. سان- پاۋلۋ اۋرۋحاناسىندا ءبىرقاتار تەستىلەر تاپسىرعاننان كەيىن، ناتيجەسى ۆيرۋستىڭ بار ەكەنىن راستاعان.
باسپاءسوز كونفەرەنسياسى بارىسىندا برازيليانىڭ دەنساۋلىق ساقتاۋ ءمينيسترى لۋيس ەنريكە ماندەتتا پاتسيەنت ءوزىن جاقسى سەزىنەتىنىن، ۇيىندە بولاتىنىن حابارلادى. ول ۆيرۋستىڭ جازدا تروپيكالىق ەلدە قالاي وتەتىنىن بيلىك باقىلاپ وتىراتىنىن ايتتى. ماندەتتا سونداي- اق ەلدە ۆيرۋستىڭ تارالۋىن تەجەۋ شارالارى تۋرالى ءمالىم ەتتى.
سارسەنبى كۇنى كەشكە فينليانديادا كوروناۆيرۋس جۇقتىرۋدىڭ العاشقى جاعدايى تۋرالى جاريالاندى. Helsinki Times تىڭ حابارلاۋىنشا، فينليانديا تۇرعىنى جاقىندا يتاليانىڭ سولتۇستىگىنە جاساعان ساپارىنىڭ ناتيجەسىندە كوروناۆيرۋس جۇقتىرعان.
ناۋقاس ميلاننان حەلسينكيگە جەكسەنبىدە ورالعان، سودان بەرى تەك ەكى اداممەن سويلەسكەن. دارىگەرلەر ولارمەن بايلانىسقا شىقتى، ءبىراق ازىرگە ەكەۋىندە دە ۆيرۋستىڭ بەلگىسى جوق.
حەلسينكي اۋرۋحاناسى جانىنداعى ۋنيۆەرسيتەتتىنىڭ مالىمەتىنشە، اتالمىش جاعدايدا ۆيرۋس جۇقتىرۋ قاۋپى وتە تومەن ەكەنى جانە باقىلاۋدا ەكەنى بەلگىلى بولدى.
كوروناۆيرۋس ەۋروپاعا بىرتىندەپ كەلىپ جاتىر. العاشقى ينفەكسيا جۇقتىرۋ جاعدايلارى اۋستريا مەن حورۆاتيادا، نورۆەگيادا، رۋمىنيادا تىركەلگەن. گەرمانيا تۇرعىنىنىڭ COVID-2019 كوروناۆيرۋس جۇقتىرعانى انىقتالدى.
ەۋروپادا ەڭ الاڭداتارلىق جاعداي يتاليادا بولىپ وتىر، وندا 11 ادام COVID-2019 ۆيرۋسىنان كوز جۇمعان.