ۋكراينادا «قىرىم اننەكسياسىنا توتەپ بەرۋ» ارنايى كۇن رەتىندە بەلگىلەندى
وسىدان التى جىل بۇرىن ناۋرىز ايىندا رەسەي قىرىمعا اسكەر جىبەرىپ، قارا تەڭىزدەگى تۇبەكتى باسىپ العان. وندا وتكەن رەفەرەندۋمدى كەمىندە ءجۇز مەملەكەت زاڭسىز دەپ تانىعان.
سول جىلى ءساۋىر ايىندا رەسەي ۋكراينا شىعىسىنداعى قارۋلى سەپاراتيستەرگە قولداۋ كورسەتتى. ءالى كۇنگە دەيىن جالعاسىپ جاتقان قاقتىعىستان 13 مىڭنان استام ادام قازا بولعان.
ۋكراينا پرەزيدەنتى كەڭسەسىنىڭ تاراتقان مالىمدەمەسىندە «2014-جىلى 26- اقپاندا ماسكەۋمەن جىلى قارىم-قاتىناس ورناتقان ۆيكتور يانۋكوۆيچ بيلىكتەن كەتىرىلگەننەن كەيىن قىرىم استاناسى سيمفەروپولدە ۋكراينالىقتار رەسەيدىڭ جاۋلاپ الۋىنا قارسى ءىرى نارازىلىق وتكىزدى» دەلىنگەن.
زەلەنسكي مالىمدەمەدە مەملەكەت باسشىسى رەتىندە عانا ەمەس، ۋكراينا ازاماتى رەتىندە قىرىمدى ۋكرايناعا قايتارۋدى كوزدەيتىنىن ايتقان. ونىڭ ايتۋىنشا، ۋكرايناعا تۇبەكتى قايتارۋ تالپىنىسىن حالىقارالىق قاۋىمداستىق قولداپ وتىر.
«بۇل كۇننىڭ كەلەتىنىنە دە سەنىمدىمىن» دەدى زەلەنسكي.
كرەملدىڭ باسپا ءسوز حاتشىسى دميتري پەسكوۆتىڭ ايتۋىنشا، زەلەنسكيدىڭ ايتقاندارى «قىرىمداعى شىنايى احۋالمەن سايكەس كەلمەيدى» جانە ماسكەۋ زەلەنسكيدىڭ بۇيرىعىمەن «تولىعىمەن» كەلىسپەيدى.
ءبىر كۇن بۇرىن ا ق ش پرەزيدەنتى دونالد ترامپ رەسەيدىڭ ۋكرايناعا قاتىستى اگرەسسياسىنا بايلانىستى بۇعان دەيىن سالىنعان سانكسيانى تاعى ءبىر جىلعا سوزعان.
«ازاتتىق»