بارشا ەل اباي بولىپ تەبىرەنىپ، اباي بولىپ جىرلاپ جاتىر - كەنجەحان ماتىجانوۆ

None
None
الماتى. قازاقپارات - قازاقستاننىڭ ەڭبەك سىڭىرگەن قايراتكەرى، فيلولوگيا عىلىمىنىڭ دوكتورى كەنجەحان ماتىجانوۆ ابايدىڭ 175 جىلدىعىنا ارنالعان پوەزيا جانە مۋزىكا كەشىنەن العان اسەرىمەن ءبولىستى، دەپ حابارلايدى قازاقپارات ءتىلشىسى.

رەسپۋبليكا سارايىندا وتكەن كەشتە ينە شانشار ورىن بولمادى. سالتاناتتى شاراعا الماتى قالاسىنىڭ اكىمى باقىتجان ساعىنتايەۆ، زيالى قاۋىم وكىلدەرى، مادەنيەت قايراتكەرلەرى قاتىستى.

كەشكە قاتىسقان م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ اتالعان ءىس-شارانىڭ ماڭىزى مەن حاكىم اباي مۇراسىنىڭ ەرەكشەلىگىنە توقتالدى.

«مەنىڭ ويىمشا، ەرەكشە كەش بولدى. ويتكەنى بيىل - اباي جىلى. ەل بولىپ ابايدىڭ مەرەيتويىن تويلاۋعا كىرىستىك. بارشا ەل اباي بولىپ تەبىرەنىپ، اباي بولىپ جىرلاپ جاتىر. بۇل رەتتە الماتىنىڭ ورنى ەرەكشە دەر ەدىم. ويتكەنى ەلىمىزدەگى بارلىق زيالى قاۋىم وكىلدەرى، ابايتانۋشىلار، ابايدىڭ اندەرىن، مۋزىكاسىن ورىنداپ جۇرگەن ارتىستەر دەرلىك وسى قالادا. رەسپۋبليكا سارايىندا وتكەن كەشتە حالىق ەرەكشە ىقىلاسپەن، ەمىرەنە تىڭداپ وتىردى»، - دەدى كەنجەحان ماتىجانوۆ.

ونىڭ ايتۋىنشا، زالدىڭ كورەرمەنگە تولى بولعانى حاكىم اباي مۇراسىنىڭ قۇندىلىعىن بايقاتتى.

«بۇل كەشتە ءبارى بولدى. سانامىزعا سىڭگەن، بۇرىننان جاتتالعان ءداستۇرلى ابايدى كوردىك. كەمەڭگەر تۇلعانىڭ مول مۇراسى قۇددى ءبىر كەشكە سىيىپ كەتكەندەي كۇي كەشتىك. ابايدى جاڭاشا ءتۇسىندىرۋدىڭ، ابايدى جاڭاشا ۇعىندىرۋدىڭ زاماناۋي ۇلگىسى كورسەتىلدى. عاجاپ كەشتىڭ كۋاسى بولدىق»، - دەدى م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى.

كەنجەحان ماتىجانوۆ سونداي- اق وسىنداي ءىس-شارالاردىڭ ارقاسىندا ۇلى ابايدىڭ مۇراسى زاماننان تىس قۇندى، بارلىق ۇرپاق ءۇشىن وزەكتى ءارى تۇسىنىكتى بولاتىنىن اتاپ ءوتتى.

«ابايدىڭ ماڭگىلىك ەكەنى ءسوزسىز. اباي ەش ۋاقىتتا ەسكىرمەيدى، سانامىزدان كەتپەيدى. ول - ءبىزدىڭ جۇرەگىمىزدە، قازاقتىڭ ساناسىندا تۇر. كەشتى ۇيىمداستىرعان، ونىڭ سەناريىن جازىپ، جوعارى دەڭگەيدە ورىنداپ شىققان بارلىق شىعارماشىلىق ۇجىمعا العىس ايتۋ كەرەك. بۇل كەشتى رەسپۋبليكانىڭ بارلىق ۇلكەن ساحنالارىنا شىعارساق تا، ارتىق بولمايدى. الماتىدا جاسالعان بۇل دۇنيەنى كورسەتۋ كەرەك دەپ ويلايمىن. البەتتە، تالعامعا تالاس جوق. اركىمنىڭ قابىلداۋى ءارقيلى. دەسە دە، بۇل كەش باسقا كەشتەن وزگەرەك بولدى دەۋگە ابدەن نەگىز بار»، — دەدى ك. ماتىجانوۆ.

سونداي-اق، ول ابايدىڭ 175 جىلدىعىن مەرەكەلەۋ اياسىنداعى ءىس-شارالاردى وتكىزۋ جونىندەگى الداعى جوسپارلارىمەن، الماتى قالاسىنىڭ مادەني استانا رەتىندەگى ەرەكشە ءرولى تۋرالى دا اڭگىمەلەدى.

«ق ر پرەزيدەنتى ارنايى مەملەكەتتىك كوميسسيا قۇرعانى بەلگىلى. ونىڭ جوسپارى دا بەكىتىلگەن. رەسپۋبليكا بويىنشا وسىنداي ءىرى شارالار ءورىس الاتىنى بەلگىلى. ءبىراق قالاي بولعاندا، كوپشىلىگى الماتىعا كوز تىگەدى. كەش الماتىنىڭ ابىرويىنا، بەدەلىنە ساي كەلەتىن كەش بولدى. بۇدان كەيىن دە وسى مانەردە، وسى ارنادا ابايدى تويلاۋ، ابايدىڭ بۇكىل شىعارماشىلىعىنا، جۇرەگىنە سۇڭگۋ، سونىڭ ارعى جاعىنداعى شىن اسىلدى تابۋ، سوعان ءۇڭىلۋ - بۇل جاس ۇرپاققا بەرىلەتىن ۇلكەن ساباق. سوندىقتان ابايدىڭ تويى - تويلاۋ ءۇشىن ەمەس، ابايدى ءتۇسىنۋ ءۇشىن، ءبىلۋ ءۇشىن، جاڭا ۇرپاققا جەتكىزۋ ءۇشىن، ابايدى كەلەشەككە سول ءوزىنىڭ دانىشپان قالپىندا تۇعىرىنا قوندىرۋ ءۇشىن جاسالاتىن دۇنيە»، - دەدى ك. ماتىجانوۆ.

ايتا كەتەيىك، كەشە الماتىداعى رەسپۋبليكا سارايىندا ابايدىڭ 175 جىلدىعىنا ارنالعان پوەزيا جانە مۋزىكا كەشى ءوتتى .

سوڭعى جاڭالىقتار