كوروناۆيرۋس الەمدىك ەكونوميكاعا ۇلكەن سوققى اكەلۋى مۇمكىن
Oxford Economics ساراپتامالىق ورتالىعىنىڭ بولجامى وسىنداي. سالدارىنان الەمدىك جالپى ىشكى ءونىم دەڭگەيى %1,3 كە تومەندەۋى مۇمكىن. دەندەگەن دەرتتىڭ ماتەريالدىق شىعىندارى مەن ءتۇرلى ەلدەردىڭ ونىمەن كۇرەسكە قانشا قارجى ءبولىپ جاتقانى جايلى «حابار 24» ءتىلشىسى ايتادى. COVID-19 ۆيرۋسىمەن كۇرەستە اۋىرتپالىق ەڭ الدىمەن قىتايعا ءتۇسىپ وتىرعانى انىق. بۇل ماتەريالدىق شىعىندارعا دا قاتىستى. اسپان استى ەلى وسى كۇنگە دەيىن ىندەتپەن كۇرەسكە 14 ميلليارد 360 ميلليون دوللار جۇمساعان. قوماقتى قارجى ناۋقاستاردى ەمدەۋگە، عيمارات پەن نىسانداردى زاراراسىزداندىرۋعا جانە وزگە دە پروفيلاكتيكالىق شارالارعا جۇمسالدى. ۆيرۋسپەن كۇرەسكە باعىتتالعان 14 ميلليارد دوللاردىڭ ۇشتەن ەكى بولىگىن ايماقتارداعى اكىمشىلىكتەر بولگەن.
كونگ ليانگ، قىتايدىڭ ۇلتتىق دامۋ جانە رەفورمالار جونىندەگى باس كوميسسياسىنىڭ ءتوراعاسى:
- ەپيدەميانىڭ ەكونوميكامىزعا قاتتى سوققى بەرگەنى ءسوزسىز. ويىن- ساۋىق يندۋسترياسى جانە قىزمەت كورسەتۋ سالاسى ايتارلىقتاي شىعىنعا باتتى. ورتا جانە شاعىن كاسىپورىندار ۇلكەن پروبلەمالارعا تاپ بولدى. ودان بولەك، ۋنيۆەرسيتەت تۇلەكتەردىڭ جۇمىسقا ورنالاسۋى قيىنداعان. قىتايدىڭ ارنايى اكىمشىلىك اۋدانى گونكونگ باسشىلىعى دا شامامەن 15,5 ميلليارد دوللار بولەتىن بولدى. قارجى جاپپاي ەرەۋىلدەر مەن COVID-19 ۆيرۋسىنان السىرەگەن ەكونوميكانى قولداۋعا باعىتتالادى. ودان بولەك، جەرگىلىكتى بيلىك گونكونگ تۇرعىندارىنا اقشا ءبولۋ شەشىمىن قابىلداعان. بۇل جەرگىلىكتى تۇتىنۋدى ىنتالاندىرىپ، بيۋدجەت تاپشىلىعىنا قاتىستى تۇيتكىلدەردى شەشۋگە باعىتتالعان.
الەكس ۆونگ، Ample Capital كومپانياسىنىڭ وكىلى:
- بيلىك ەپيدەميامەن كۇرەسكە قولدان كەلگەننىڭ ءبارىن ىستەپ جاتىر. وسى رەتتە تۇرعىندارعا 10 مىڭ گونكونگ دوللارى تولەنەدى. بۇل شامامەن 1300 ا ق ش دوللارى. اقشا 18 گە كەلگەن تۇرعىندارعا بەرىلەدى. جالپى كوروناۆيرۋس ازيادان بولەك، كارى قۇرلىقتا دا تەز تارالىپ بارادى. وسى رەتتە ەۋرووداق وكىلدەرى دە ىندەتپەن كۇرەسكە 230 ميلليوننان اسا ەۋرو ءبولدى. يتاليادا جاعدايدىڭ ۋشىعۋىنا بايلانىستى ەۋروپالىق بيرجالاردا باعالار تومەندەپ جاتىر. ويتكەنى اپەننين تۇبەگىندەگى بۇل مەملەكەت ەۋرووداق ءۇشىن ەكونوميكاسى ماڭىزدى ءۇشىنشى ەل. ا ق ش پرەزيدەنتى دونالد ترامپ بۇل ماقساتقا كونگرەستەن 2,5 ميلليارد دوللار سۇراپ وتىر. ال، اۆستراليا بيلىگى بولسا، ۆيرۋستىڭ ەكونوميكاعا كەلتىرەتىن شىعىنىن ەسەپتەۋگە كىرىسىپ كەتتى. ويتكەنى اۆستراليا ەكسپورتىنىڭ ۇشتەن ءبىرى قىتايعا تيەسىلى.
دجوش فرايدەنبەرگ، اۆستراليانىڭ قارجى ءمينيسترى:
- اۆستراليا ەكونوميكاسىنا ىشكى جانە سىرتقى قاتەرلەر قاۋىپ ءتوندىرىپ وتىر. كوروناۆيرۋستىڭ سالدارىنا قاتىستى ناقتى ءدوپ باسىپ ايتۋ مۇمكىن ەمەس. الايدا، ونىڭ كەرى اسەرى بۇكىل ەلدى دۇرلىكتىرگەن الاپات ورمان ءورتىنىڭ شىعىنىنان اسىپ تۇسەتىن ءتۇرى بار. ال، قىتايدىڭ وزىندە جاعدايدىڭ ۋشىعۋىنا بايلانىسى كەيبىر تاۋارلارعا سۇرانىس كۇرت ارتىپ كەتكەن. اسپان استى ەلى تۇرعىندارى ويىن پريستاۆكالارىن، كىتاپتار، جاتتىعۋ قۇرىلعىلارى مەن يوگاعا ارنالعان توسەنىشتەردى جاپپاي ساتىپ الىپ جاتقان كورىنەدى. اقپاندا كىتاپتاردىڭ ساتىلىمى %60 كە، تاتتىلەردى پىسىرۋگە ارنالعان جابدىق ساتىلىمى 7 ەسە ارتقان. ال، رەسەيدە كوروناۆيرۋسقا قاتىستى ۇرەيدىڭ كۇشەيۋىنە بايلانىستى وتكەن ايدا ەمدىك قاسيەتىمەن تانىمال سارىمساق باعاسى %37 كە قىمباتتاعان.
www.24.kz